Syria yimjung senden nung shilem agitsü mulunga lir: Syria sorkar

Damascus, January 09 (Agencies): United Nations (UN)-i Switzerland kübok Geneva nung tan January ita 25 nü amentsü ayongba Syria yimjung senden nung shilem agitsü mulungba olen ka Syria sorkari metetdaktsüogo.
Syria Foreign Minister, Walid al-Muallem-i par linük semdangsang, UN’er Syria envoy, Staffan de Mistura den Damascus yimti nung ajurutepba sülen sorkari yimjung senden nung shilem agitsü mulungba olenji sangoktsü.
Ajisüaka, iba yimjung senden amenba jakdang kasa senden nung shilem agitsü renemba sorkar anemer telok tarensen metetdaktsütsü takhangba ka Syria sorkari benokogo.
Syria nung nisung 250,000 shi tepseta taoba küm 5 tejaklen nungi tenzüka mangatettep adoka tongpang rarabaren agientsü nükjidong nung UN-i alima lenirtem tenüng nung Geneva senden ya ayonger lir.
Syria sorkar anemer telok ajunga kiralongrar telok ta Tir Bashar al-Assad-i aniba Syria sorkari züngoker.
Ajisüaka, “Tan ayongba ama, Syria yimjung sendenji takok ngua mementettsü akok,” ta sorkar anemertemi temulung malemba olen ka metetdaktsüogo.
Ano, Saudi Arabia aser Syria sorkar anemer nungita pusemba Iran linük na tsüngda tang tesendaktep mejungi akümba yong iba jagi Syria yimjung senden nem tetsükdaktsü bener arutsüsü akok.
“Syria sorkari Geneva nung ayongba yimjung senden nung shilem agitsü mulunga lir. Ajisüaka, kasa senden nung shilem agitsü renemba sorkar anemer telok tarensen tamasa metetdaktsütsüla,” ta Muallem-i metetdaktsü.
UN aser alima tashi abenba linük lenirtemi ayonger külen taoba mapang nunga Syria yimjung senden ayonga menogo saka item sendentem amenba ajanga tanü tashi temelenshi tajung ka bener aruja mali.