Syria yimjung senden sangküm January ita amentsü: UN

United Nations, December 22 (Agencies): United Nations (UN)-i maneni ayonga Syria yimjung senden taruba 2016 küm January ita amentsü sentong renemba osang ka UN-i tanü Mongolbar nü metetdaktsüogo.

“Syria yimjung senden sangküm January ita menshitsü sentong renemogo. Ajisüaka, senden amentsü anogobo tang tashi lateta mali,” ta Geneva nung tentetba UN Office lenisang, Michael Moller-i osang jangjashitsü.

UN-i ayonger külen Syria Tir, Bashar al-Assad-i aniba Syria sorkar aser sorkar anemer teloktem na tsüngda yimjung senden anaben tashi yaküm, 2014 küm Geneva nung amenba osanga jangjaogo.

Ajisüaka, tanü tashi nung ayonga amenba Syria yimjung senden takok ngua mementeti lir.

Mangatettep adokba Syria telok rong nung tangatettep kati marutetba den külemi, par Syria aser kidangsüa aliba Iraq linük na nung Islamic State (IS) kiralongrar teloki lendong kanga sashia atalokdaktsütsü tenzükba ajanga Syria yimjung sendenji bilemba ama takok ngua mementettsüsa akümba osang jangjaogo.

Yamaji aruaka, UN densema, alima tashi abenba linüktemi ayonger külen Syria nung tongpang rarabaren anenja par yimtenren ken o bentettsütsü nükjidong yur nungdakba maparen kanga meranga inyaktsü tenzüka lir.

Syria’er mangatettep ken o bentetja par linük nung yimtenren tensa junga akümba ajanga IS samatsütsü maparen takok ngua inyaktettsü ta US Secretary of State, John Kerry densema, alima lenirtemi metetdaktsüogo.

UN-i ketdangsüa Syria’er yimtenren ken o bentettsütsü maparen inyaktsü telemtetba ka UN Security Council (UNSC)-ia taoba hopta agiogo.

Syria nung mangatettep adokba teloktem rong nung yimjung tezüngzüktep agidaktsüba sülen parnok külem lungjemdaktsür teloktep sorkar tenteta ita 18 tashi nung election agia Syria sorkar tasenba tentettsütsü alizüng UNSC-i yua lir.

Taoba mapang, 2011 küm nungi tenzüka Syria sorkar aser sorkar anemer na tsüngda tongpang kanga sashia raraba ajanga tanü tashi nung nisung 250,000 dak tema asüba aser par nütsüng yongsük shilem ana nung shilem kabo tang Syria toktsür bendanglen jenoka aliba osang bushiteta lir.