Syria yimjung tezüngzüktep agiba sülen 530 shi tepsetogo: SOHR

Beirut, March 22 (Agencies): Syria Tir, Bashar al-Assad-i aniba Syria sorkar aser sorkar anemer na tsüngda meraratsü tezüngzüktep agir anogo 23 tsüngda nung yimjung tezüngzüktep agiba tesemtem nung ishiba agi nisung 530 shi tongpang balala nung asüba osang ka Syrian Observatory for Human Rights (SOHR) teloki tanü, Mongolbar nü metetdaktsüogo.

“Taoba February ita 27 nü nungi tenzüka Syria sorkar aser sorkar anemer na tsüngda meraratsü tezüngzüktep agiba sülen tanü tashi nung nisung 530 shi tepsetba osang bushitetogo,” ta Britain nung tentetba SOHR teloki osang jangjashitsü.

Ano, yimjung teüzüngzüktep magiba tesemtem nunga nisung 1,279 shi asüba osang bushiteta lir ta par teloki shisem.

Syria sorkar aser sorkar anemer na tsüngda Switzerland kübok Geneva nung yimjung senden takok ngua amentsü nükjidong nung par telok anati taoba hopta 3 jakdang nungi tenzüka meraratsü tezüngzüktep agia lir.

Ajisüaka, Islamic State (IS) aser al-Qaeda telok den sentaktepba Nusra Front teloktembo iba yimjung tezüngzüktep nung densema mali.