Syria yimjung tezüngzüktep agitsü lenmang bushitsü: Mistura

Vienna, October 31 (Agencies): Tang mangatettep ken o tulu adoka raratepba Syria sorkar aser sorkar anemer na tsüngda yimjung tezüngzüktep agidaktsütsü asoshi lenmang bushitsü telemtetba ka yashi Vienna nung ayonga amenba Syria yimjung senden nung shilem agirtemi lemetetba osang ka Syria-i yokba United Nations (UN) Special Envoy, Staffan De Mistura-i metetdaktsüogo.
UN-i ketdangsüa Tir Bashar al-Assad-i aniba Syria sorkar aser sorkar anemer na tsüngda yimjung tezüngzüktep agitsü ayongtsü lemtetba den külemi, Islamic State (IS) densema Syria nung lendong kanga sashia atalokdaktsüba kiralongrar telok ajunga meshimeshia samatsütsü asoshi yashi senden nung lemtet ta pai ashi.
UN aser European Union (EU) na den külemi, alima linük 17 dak tema nungi lenirtemi yashi ghonda 7 shi agia senden amenba sülen tan telemtetbaji agir lir.
Ano, hopta 2 shi süir külen parnoki tanaben ajurutepa Syria nung yimtenren tebentetbaren bener arutsütsü asoshi nungdakba onüktem benoka jembitsü asoshi renemogo.
Aji oda, UN-i aniba telok, Syria sorkar aser sorkar anemertemi amalitepa inyaka Syria nung sorkar tasen aser linük temzüng tasen tenteta latettsü lenmang bushitsü asoshi tan senden nung shilem agirtemi renemer lir.
Ano külen, US mitkar ishika Syria anüdokleni yoktsü asoshi US Tir, Barack Obama-i ozüng agütsüba osang ka US Secretary of State, John Kerry-ia yashi metetdaktsüogo.