Syria yimjung tezüngzüktepi Turkey linük malentsü: Davutoglu

Istanbul, February 25 (Agencies): Syria yimjung tezüngzüktepi par Turkey linük malendaktsütsü renemba olen ka Turkey Ato Kilonser, Ahmet Davutoglu-i tanü, Brehostibar nü metetdaktsüogo.
“Syria nung mangatettep adoka alir rong nung yimjung tezüngzüktep agiaka, par linük tensa majungba ajanga Syria nung tentetba Syrian Kurdish YPG aser Islamic State (IS) teloktemi ozü Turkey nem lendong bener arutsütsüsa tensa ajurura, ozü linüki tapet telangzüba agütsütsü renema lir,” ta pai sangoktsü.
“Turkey linük kümzüka ayutsü telemtetbaji ozü Turkey-i dang agitettsü,” ta shia, tarutsü mapang nung amakba lendong balala mataloktsüsa Syria yimjung tezüngzüktep agitsü tajungshiba olen ka paisa lemsatepa liasü.
Ano külen, “Syria sorkari tongpang rarabaren anentsü mulungtetba tendangtsü lenmang tajung ka Syria yimjung tezüngzüktepji lir,” ta shia, Syria Tir, Bashar al-Assad-i aniba Syria sorkar anemer teloktemia Russia aser US nati ayongba Syria yimjung sentong nung shilem agia Syria sorkar den yimjung tezüngzüktep agitsü mulungba olen ka metetdaktsüogo.
Taoba mapang lemtetba ama, tongpang raratsüren anentsü renema liaka, par telok amakertem denbo tongpang raratsü renemba osang ka YPG telokia metetdaktsü.
Ano külen, “Alima ajunga nung kiralongrar telok tetsüti, IS teloki ayuba ama, YPG telokia Syria telok ana küma sadangtsütsü alizüng yua lir,” ta Turkey Foreign Minister, Mevlut Cavusoglu-ia temulung malemba olen ka metetdaktsüogo.
IS telok anema raratsü asoshi Saudi Arabia mitkar F-15 tayimtsütema par Turkey asüng, Hokolbar nü tashi nung tonga arutsü sentong aliba osang ka paisa metetdakja liasü.