Syria:Anüng nungi amakdang nisung 33 asü

Beirut, March 22 (Agencies) : Raraba mapang pei ki toktsür jenshiba nüburtem jenoka aliba school ka koba tang telungpurtemi amanglema lir, iba tesem US-i aniba teloki amakba mapang tajemba agi nisung 33 asü, ta Bodhbarnü rara asadanger teloki metetdaktsü.
Syrian Observatory for Human Rights teloki, Al-Mansoura anüolentip tsütsü Islamic State (IS) teloki amanglema aliba Raqa province ya Mongulbar anepdang amak, ta ashi.
IS telok den rarar linük 68 nungi tongti lenirtem Mongulbarnü Washington nung ajurutepa Iraq aser Syria na nung IS teloktem aliba tesemtem amaktsü US Tir Donald Trump-i sentong koma yanglua ali ibaji angadangteptsü.
US-i aniba teloki 2014 nungi IS telok aliba tesemtem nung bomb agi maka arur aser ano tang Raqa yimti nung mezng dang nungi tesashiba amaker. Raqa yimti ya “Islamic caliphate” amenoka aliba tesem tiyong lir.
Mongulbarnü amakba, school ki asüba tang nüburtem jenoka aliba tesem ya Raqa anüolen nungi kilometer 30 (mile 20) pilar lir.
“Onoki tang tashi nung nisung 33 asüba jangjaogo, aser item tasürtemji Raqa, Aleppo aser Homs tesemtem nungi jenshiba nüburtem lir,” ta Observatory telok nung tekolakba Rami Abdel Rahman-i ashi.
“Lendong atalokba tesem nungi ano tasümangsa agitetdar. Iba tesem nungi nisung ana dang taküm agiteta lir,” ta Abdel Rahman-i osangbenertem dang ashi.
Britain nung amenoka aliba monitor telok shirnoki Syria nung aliba osangbenertem dang nungi osang tejangja agiteper parnoki ashiba agi, tesem balala shia tayimts balala amshia amker.
“Raqa yimti ola madoki tepsetdar,” ta osangbenertemi ashi.
“Tan amakba school nung raradang jenshir kibong 50 shi jenoka lir,” ta kasa osang ajanga metetdaktsü.
US-i aniba teloki amakdang tasba jenti atalokogo aser school rangben amai samatsogo, ta Syria nung osangbenertemi US aija ashi.
Ita tetenzklen US-i aniba teloki, Syria aser Iraq nung anng nungi amakba mapang memeteti tajemba agi civilian 220 shi tepsetogo, ta ashi.
Aji oda saka rara asadangertemibo iba dang nungi tali süogo, ta ashir.
Syria nung March 2011 nungi linük Tir Bashar al-Assad anema rara adoker külen nisung 320,000 dak tema süogo aser nisung million aika pei talidak yutsür jenshiogo.
Iba mepetmesü ajanga jihad raratema temai adokba ajanga US dena, international tashi amshia nokdangtsü mapang agi bener arutsü.
Trump-i link nung ketdangser tekolakpur dang IS telok indang caliphate ta ajaba tesem meshi meshia samatsütsü tetuuba agütsüogo aser iba osangji US den lokteper aliba linüktemia jangja metetnüa Bodhbarnü senden nung adentsü.
Taoba ita Pentagon-i IS anema raratsü sentong Trump nem yanglua agüja aliba nung US den loktepa aliba linüktemia parnoki bilemba shidangtsü.