Syria:Chemical agi amakdang nisung 58 asü

Damascus, April 4 (Agencies) : Mongulbarnü Syria nung sorkar anemertem aliba tesem nung chemical agi amakba lendong nung tajemba agi nisung 58 asü. Item tasürtem rongnungji tanur 11 tashi dena liasü, ta rara asadanger telok kati ashi.
Syrian Observatory for Human Rights (SOHR)-i, iba lendong ya Idlib province kübok Khan Sheikhoun jila nung atalok, ta ashiba osangbenertemi metetdaktsü.
Mozü kidang inyakertemi ashiba agi, tasürtemji tango mesapui asüba putetogo.
Ano külen Syria opposition indang High Negotiations Committee-ibo iba chemical agi amakba lendong nung nisung 100 süogo aser iba amakba mapang amshiba tayimtsütemji Syria indang asü mesüra Russia indangar mejangja, ta Twitter ajanga metetdaktsü
Parnoki Facebook post ka ajanga ashiba agi, tayimtsü nungi chlorine gas keta aliba thermobaric bomb pezü tsükdaktsü.
European Union aser United Nations nati Brussels nung Syria tarutsü atema ayongba anogo ananü senden ka amen tenzüknü iba lendong atalok, ta osang ajanga ashi.