Syrian army-i northern Syria nung airport ka atsüngtetogo

Amman, May 13 (Agencies): Eastern Aleppo yimti tezülen Islamic State kübok aliba ‘airbase’ tilaka Russia aser Syrian air forces-i anüng nungi bomb yoka teyari agüja Syrian army-i makdokogo, ta army nungi osang ka ajanga Honibarnü metetdaktsü.
Al-Jarrah airport ya eastern Aleppo yimti tezülen Kiralongrartem aliba tesem nung lir. Iba tesem nung Syrian army, US puri-i teyari agütsüba Kurdish-i aniba telok aser Turkey-i yariba Free Syrian Army (FSA) telok kanga tashiita aliba ajanga parnok kübok aliba tesemtem aika mazüokteti kümogo.
Iba airport ya yaküm March ita ‘army elite force’-i amak, saka kiralongrartemi nokdang. Iba airport ya 2014 nungi parnok kübok liasü.
Russia aser Syria nunger jet temi Maskaneh jila tali amak tenzükogo. Iba jila ya eastern Aleppo nung Euphrates ayong west tsütsü tatembang buba tongtibangtiba jila lir, ta taoba mapang iba tesem nung alir kati kinungertem dang ashi.
Taoba hopta nungi tenzüka kiralongrar kübok tangtashi aliba tanüngba jila aser yimtsüngtem nung anüng nungi bomb yoka amakba mapang nüburtem aika süogo, ta UK-based Syrian Observatory for Human Rights ajanga metetdaktsü.