Syria:US-i Bin Laden den sendaktepa alir ka tepset

Washington, February 09 (Agencies) : US sepaitemi anüng nungi anaben tashi amakba mapang Al Qaeda telungpur parnok nisung 11 tepsetogo aser item rongnungji Osama bin Laden den mapang talangka sendaktepa aliba nisung ka dena lir, ta Defense Department-i ashi.
Bin Laden den külemi inyaka alisang, Abu Hani al-Masri ya Honibarnü Idlib anasa anüng nungi anaben buba amakdang tepset, ta Bodhbarnü US defence ketdangser tejen kati ashi.
“Pa ya Al Qaeda telungpur züngsem tejen ka liasü aser iba mapang pa par telok nung lenir tejen Bin Laden aser Ayman al-Zawahiri na den tesendaktep kang tashi ita aliba nisung ka liasü,” ta Defense Department nung otongdari ashi.
“Iba ama amakba ajanga Al Qaeda-i US dak rangloker tema nungi chitepa amaktsü tasa asaa aliba raksatsüogo,” ta Pentagon atema otongdar aser Navy Capt. Jeff Davis-i ashi.
Pai, taoba hopta Idlib nung anüng nungi mezüng amakba mapang Al Qaeda telungpur 10 tepset, ta ashi.
Zawahiri ama Masri-a Egypt nungersa liasü aser ashiba agi pa ya Al Qaeda telok tenzükba mapang nungi parnok atema rara aru, ta osangbenertemi ashi.
“Afghanistan nung 1980s aser 1990s mapangtem nung Al Qaeda telungpurtem training agiba teseptem Masri-i repranga liasü aser iba mapang pai nisung tasen jenti shimoka tesayuba agütsü. Tang item nisungtem jagi alima tesem aika nung lendong agütsür,” ta Defense Department sangdong ka nung shia lir.