T R Zeliang anema benokba ken o tem JMFC Peren-i agiener

Dimapur, July 29 (TYO) : Hokolbarnü Judicial Magistrate First Class, Peren-i Chief Minister T R Zeliang indang tazüngba kuli atema benokba ken o tem mapang süiba onük nung ajemdaker agienogo.
Ken o temji yashi benoka angadangba sülen tanü Judicial Magistrate-i iba mapa ya yimten mangatettep nung ajemdaker inyakba ama ajiteter ta shia oshidang agütsü, ta CMO Nagaland sangdong ka nung metetdaktsü.
Taküm June 15 nü Supreme Court-i iba ken o ya JMFC Peren dang tamasa mapang telatet indang kuli bushitsü atema tetuyuba agüja liasü.
November 2015 nung Jotsoma yimer Maziezokho Nisa ta ser nisung kati Representation of People Act, 1951 nung Arla 125 A kübok Nagaland Chief Minister-i tazüngba kuli tiyazü agütsüba anema ken o ka benok.
Ano, iba den mesüktepba July 2015 nunga ken o ka Jalukie nungi KK Kulimbe (Kengim)-i Chief Minister anema benoka liasü.
Ken o anaji kasa dang asüba yong okadaki külemi dang benoka angadang aser iba sülen mapang süiba onük nung ajemdaker agienogo.
Representation of People Act nung Section 125-A kübok aitsürtemji ita trok tashi tepuokdak ayutsü temerenshi agütsür, mesüra senchi achir, mesüra anaprongla inyaker. Code of Criminal Procedure nung Arla 468 nung ajemdaker reprangdang nung, ken o anaprong ya küm ka tsüngda nung benoktsüla ta lateta lir, anungji February, 2014 matongdang benoktsüba liasü, ta JMFC Peren-i ashi.
“Complaint case anaprongla ya mapang telatet ka nung benoktsüla aser mapang menur benokba atema kuli tejangja kecha mangu nung, ken o anaprong agienür” ta Magistrate-i tanü oshidang agütsü.