T.R.Zeliang aser Shurhozelie na prongla menden nungi alutsüla

Dimapur, Nov.10 (TYO) : Nagaland nung municipal aser town council nung tetsürtem nem 33 % lemzüktsür election agitsü sangdongba ya tatar senden nung lemtetba anema inyaker asütsü, anungji Chief minister, T.R.Zeliang aser NPF tir aser DAN mendenbuba Dr.Shurhozelie na prongla pei pei mena aliba menden nungi peisasa alutsüla ta Independent MLA Wb.Thomas Ngullie-i metetdaktsüogo.
Municipal aser town council nung tetsür nem shilem agütsütsü asoshi lokti tentet aikati nungnanga liasü, iba jagi taoba government nung Dr. Shurhozelie , Urban Development minister asüba mapang municipal aser town councils elections magi atatsü aser iba mapang Nagaland Municipal Act, 2001 ya khen meyipa reprangshitsü asoshi paisa ken o benok, anungji iba khen o ji agizüka kasa maparen atema Select Committee ka shim aser iba committtee nung taoba Parliamentary Affairs & Planning & Coordination, AH&V minister, T.R.Zeliang mendenbuba shim.
Iba Select Committee tenüng nung 21: 07: 2012 anogo nung osang agütsü dang, T.R.Zeliangi Nagaland nung municipal aser town council nung tetsür nem shilem balaka agiteta magütsütsü, kechiyong ibaji India temzüng arla 371 A nung Naga nunger nem agüja aliba temeten anema lir ta metetdaktsü ta MLA Thomsa Ngullei-isa ashi.
Iba Slection Committee nung tangar züngsemtemji Dr. Shurhozelie, Minister Urban Development & Municipal Affairs, Mr. Imkong Imchen, Minister, Mr. K.L. Chishi, MLA, Mr. Kipilli Sangtam, MLA Mr. K.V. Pusa, MLA aser Mr. C. Apok Jamir nungeretem liasü.
Ajisüaka, tanü kasa yimsüsürtemi tatar senden nung lemtetba ozüng raksaa inyakdi asür, anungji parnokji pei menden nungi anentsüla ta Thomas-isa metetdaktsü.
Ano, paisa ashiba agi, tang tashi nung Supreme court nungi tetsürtem nem shiem balaka shiteta yutsür municlpal aser town council election agitsü ta shia mali, ajisüaka tetsürtemi CM dangi shidi züluba sülen Chief minister-i iba telemtetba ya agi ta MLA Thomas Ngullei-isa aitsü.