T.R. Zeliang CM nungi anendaktsübaji kin tila asüba agi masü: NTAC

Kohima, March 02 (TYO) : Taoba chief minister, T.R.Zeliangi pa kin tila nungi asüba agi kin tulu purtemi pa kangshia chief minister nungi anendaktsü ta jembiba o ji pai pa chief minister nungi kechisüdirsüaka manentsü merangba sentongtem nung tamakok angu marem jembidokba mapa ka asütsü ta tanü Nagaland Tribe Action Committee (NTAC) sangdong ka ajanga metetdaktsüogo.
Manipur kübok Tamenglong nung February 28 nü election nüboyim sentong nung, T.R.Zeliangi pa kin tila nungi asüba agi chief minister nungi anendaktsü ta jembiba o ka jangjashia metetdaktsüba sangdong ka nung NTAC-i iba o ya metetdaktsü.
“T.R.Zeliangi amadoker asütsüa akok, saka pa chief minister nungi anendaktsüba kuliji pai kangshia ULB election agitsü merang dang nisung asütsüsa atalokba ajanga pa chief minister menden nungi nübortemi alutsü akang, anungji pa kin tila nungi asüba agi masü saka pa ajanga nisung taküm samatsüsa atalokba agi Naga nungeri pa agientsüsa aküm,” ta NTAC-isa metetdaktsü.
Nagaland nung kecha kin tulu aser tila mali ajak kasasa züngshir aser pai Manipur nungang oagi Nagaland nung atalokba jembibaji Manipur nung alirtem jagi pa-ang kanga meimja bilemer asütsü ta NTAC purtemisa metetdaktsü.
Yimsüsür ka menden nungi malunüseti nübortemi atsüzüka yutsüba nisung kati sasaa bilemba mashitsü saka tsükmenatsüji tasena ta dang ashitsü. Iba amaji nisung ka asoshi pa menden nungi alubaji masü saka alur külen peisasa pei alutsüsa chief minister inyaka liasüba nisung kati jembibaji kanga tia maka asütsü ta NTAC-isa metetdaktsü.
Ano talisa T.R.Zeliang aser Yitachu nati Manipur nung o talitapong jembia center-i agütsüba sepaitem amshia longkak aitertem nokdangteta liasü aser mendena maitsütsü koka liasü ta jembibajiang tesüngmangtsüka lir, kechiyong T.R.Zeliangi February 9, 2017 nü Union Home minister dangi central force meshia züluba shidi langzübajibo pa ashiba den kenyongi balala liasü aser Union Home minister of state, Kiran Rijijuia osangbener den jembidang Nagaland nung atalokba tebilemtsüji state government-i dang reprangtsüla ta shia liasü ta NTAC-isa metetdaktsü.
T.R.Zeliangi tamasayongi nübortem ola angaa chief minister menden toktsütsüba asü saka tesüsa malu majung kümer külen state nung yimjung aser tesünep alitsü atema menden toktsür ta ashibaji kecha tagitsü o masü ta NTAC-isa metetdaktsü.
Ano, Yitachui ozüng nung ajemdaker tai teratet aser tesayuba agütsüba ajanga ULB election nübortemi mulungba anema kangshia agitsü apuso aser iba jagi election-a magitet aser linük temzüng arla 371 A nung shia alibatema kümzüka mejembitet aser T.R.Zeliangi aniba government mapa nung tamakok tulu angu ta NTAC-isa ashi.
Tangar election nüboyimba sentong nung pei state nung atalokba tiyazü shia senzübaji jakla kanga majung aser tensa mapang den meputep jembia senzür ta parnoksa TR Zeliang aser Yitachu nati Manipur nung jembia senzüba onüktem aija metetdaktsü.