T.R. Zeliang-i 36 buba Nagaland Police Meet 2015 lapoktsüogo

Dimapur kübok Chumukedima nung tentetba NAPTC Ground nung agiba 36 buba Police Meet 2015 asayamong lapokba sentong nung Nagaland Chief Minister, T.R. Zeliang-i asayamong nung shilem agirtemi agütsüba aküm agizüka tanü Hombar nü shilem agiba noksa nung angur. (Chumukedima, November 16)

Dimapur, November 16 (TYO): Nagaland Chief Minister, T.R. Zeliang-i lapoktsüba sülen tanü, Hombar nü nungi tenzüka 36 buba Nagaland Police Duty cum Sports & Athlete Meet 2015 NAPTC Ground, Chumukedima nung asayatsü tenzükogo.
“Sorkar tenzüker ajunga rong nung police department ya tazüoktiba department lir. Nagaland ajunga nung tensa junga ayutsü nükjidong nung Nagaland sorkari Police department ya kanga tongtipangsüa züngshir,” ta tongti tesemdanger, Zeliang-i metetdaktsü.
“Police ketdangsertemi Nagaland aser India naprongla nung tongti shilem agiba atema kanga pelar aser tarutsü mapang nunga tangatetba tajung nung linük aser State tenzüktsü ajungshir,” ta pai ashi.
“Linük aser nübur tenzükba den külemi, saisapongtsüren nunga shilem agitsüji police züngsemtem ajunga indang teinyaktsü lir,” ta shia, parnoki saisapongtsüren nung shilem agiba ajanga parnok tazüokba nung alir ta tongti tesemdangeri shisem.
“Iba asayamong ayongba ajanga Nagaland nung tentetba police telok ajunga tali lungjemdaktsütsü imlar,” ta shia, Nagaland police züngsemtemi saisapongtsüren nung takok ngua shilem agiba ajanga state nem konang tajung bener arutsütsü tajungshiba olen ka Zeliang-i sangoktsü.
Tongti tesemdangeri asayamong lapoktsüba den külemi, iba asayamong nüngtem nung renemba nüngoa tanü sayatsüogo.
Nagaland PWD Minister, Vikheho Swu; Health & Family Welfare Minister, Longon; Advisor S.I Jamir; Parliamentary Secretary-tem Jacob Zhimomi, Yollow Konyak, Shetoyi, Essac aser Picto; taoba DGP-tem; mapa nungi anener alir tongti police ketdangsertem aser Unit commander-temi tanü asayamong lapokba sentong nung shilem agia liasü.
Nagaland tesem balala nung tentetba police unit 31 nungi asayar 2,239 shi tan asayamong nung shilem agiba osang jangjaogo.