T.R Zeliang-i aniba DAN sorkar küm 2 jungogo

Kohima, May 24 (TYO): Chief Minister, TR Zeliang lenisüba kübok Naga People’s Front (NPF)-i Democratic Alliance of Nagaland (DAN) sorkar küm ana ajungba tenüng nung Mongulbarnü State Banquet Hall, Kohima nung Tenüngsang Agütsüba sentong ka agiogo.

Iba sentong nung NPF President, Dr Shurhozelie Liezietsu-i o jembidang, Centre aser NSCN(IM) tsüngda Framework Agreement nung aliba onüktem Nagaland nung alirtem dang metetdaktsüba sülen NPF-i Naga nunger tsüngda angatetteptsü atema shilem tulu ka agitettsü, ta ashi.

“NPF-i aniba DAN sorkari Framework Agreement pusema nungiter ta ashidang, iba nung Naga nunger ajak adentsüba indang jembia arur” Dr Shurhozelie-isa ashi.

Taruba election matongdang Naga nunger taginüba metongtetra, NPF party-i election atema mapa renemtsüla, kechiyong 2018 küm tetenzüklen election agitsü, ta paisa shisem.

Chief Minister TR Zeliang aser pa den külemi inyakertem nem tenüngsang agüja jembidang, taoba küm ana tsüngda iba DAN sorkari mapa kar kanga junga inyaktetogo, ta Dr Shurhozelie-i ashi.

Mapa tajung rongnung kaji, State Assembly nung MLA 60 prongla külemi sabang ka nung longjemba ya liasü aser iba ya Naga nungeri yimjung aginüba tongdaktsütsü nükjidong nung inyak, ta NPF president-isa metetdaktsü.

Ajisüaka, sorkari kanga junga ketdangsüa arua Nagaland nung yimjung tensa liaka, tashi aginüba lennir telok kati meinpronga arur. Iba ajanga Nagaland nung olulu aser tiyazü osangtem prokshir aser nisung aika ratamatadaktsür, ta pai ashi.

Olemtep ajanga koktettsü onük tilatem asoshia mapang shia teloktemi sorkar nem anogo lateta agütsür lungkak aiter, aser khen khen item sentong ya tashi aginürtemi shisatsü agüja inyaker ama temulung melemi bilemer. Saka, ajakji liaka DAN sorkar tashi itta aser akanga lir, ta Dr Shurhozelie Liezietsu-isa metetdaktsü.

Sentong nung Nagaland BJP Vice President, James Vizo-i ashiba agi, 2003 küm asür Dr Hokishe Sema lenisüba kübok DAN pre-poll alliance yangluba sülen nungi NPF aser BJP tsüngda tesentaktep junga dang lia arur.

DAN nung adenba teloktemi Nagaland nung alirtem taginüba ama common minimum programme nung ajemdaker mapa inyaktsüla aser LADF mesüra tanga funds tem lemsateptsüla. Iba denji, public sector undertaking mesüra tanga agencies nung BJP züngsemtema shimtsüla, ta Vizo-isa tebilemba lemsatep.

Tanü sentong nung State Chaplain, Rev Kuzeirang Thou-i Tenüngsang agütsüba onük jembi aser pai ashiba agi, “iba mapang ya sorkari inyaka arubatem meyipa reprangshiba aser tarutsü atema shisadangba mapang ka lir.”

Sentong nung mendenji NPF Working President Apong Pongener liasü, Phom Baptist Church Kohima Pastor, Rev. Phomlee Van-i Lai zünga sarasadem, NPF Women W, Keziah Mero & Kekhrie Thepa aser Lotha Baptist Church choir nungeri ken aten aser Ao Baptist Church, Kohima Associate Pastor, Temjen Sempo-i sarasadema tembang.