T.R Zeliang-i asür Justice Nishitendu mang ayimer

Dimapur, November 14 (TYO) : Justice Nishitendu Chaudhury kanga dang ajungbena asüba osang angashia kanga aoksar, ta Nagaland Chief Minister-i sangdong ka nung metetdaktsü.
Ni pa den ishiben ka ajurutepogo aser küna tesüsabuba ajurubaji, Kohima nung ita ishika tejaklen pai Gauhati High Court Chief Justice meina arudang liasü. Asür Nishitendu-i temzüng-ozüng kanga junga meteta liasü aser 1980s mapang pa Gauhati High Court nung N.M Lahiri lenisüba nung anitetba nisung ka liasü, ta T.R Zeliang-i ashi.
Asür Nishitendu-i temzüng-ozüng wadang nung tetsüng majemdokdang, Government High School, Phek (Nagaland) nung Science Teacher ka ama inyak. Pai sayuba kaketshirtemi ashiba agi, paji tesayur tajung ka liasü aser kanga dang nendaka sayu.
Pai tesayur mapa toktsüba sülena, Naga nunger den tesentaktep maneni liasü aser küm aika pa Nagaland atema Portfolio Judge aser ano Station Judge ama inyaka liasü. Paisa Nagaland Legal Services Authority nung Executive Chairman mapa teinyakdak nung iba akümli toktsür ao, ta Chief Minister sangdong nungsa metetdaktsü.
Pa asüba ajanga Naga nunger atema ozüngren nung teyarir tajung ka samaogo. Pai Naga nunger kanga meima liasü. Ni sorkar aser Nagaland nung alir ajak tenüng nung asür kibong den asüku lemsateper aser Tulusang Tsüngremi anisüngzük aser tesünep agüjang ta sarasademtsür, ta T.R Zeliang-isa shisem.