T.R Zeliang-i asür Z. Obed asüku lemsatep

Dimapur, Aenjeti/Jan. 31 (TYO): Nagaland Legislative Assembly nung Opposition lenir, T.R Zeliang-i sangdong ka nung, Retired Chief Secretary aser taoba minister, Z. Obed mapang tatsüka shiraner January 30, 2020 nü asüba osang angashia kanga jashir, ta metetdaktsü.
Asür Z. Obed ya ajaki meteta aliba yimten yimsüsür aser asayar tajung ka liasü, shiba 1980-82 aser 1987-90 nung Nagaland Chief Secretary inyaka liasü. Bureaucrat ka ama aser iba sülen yimten yimsüsür ka ama Naga nüburtem asoshi pai bendanga agüja inyakogo. Pa ya ochishir taküm ka ta ni züngshir aser pa asüba ajanga Naga nunger asoshi techira aser nübu tajung ka samaogo. Pa ya medemer ka ama, adianu ka ama aser lenir ka ama küm mulung nung teti alitsü, ta Zeliang-isa ashi.
Pa asüba ya Naga nunger asoshi takoksa tulu lir, aser tang mangyim-tejashi agi sünger aliba mapang mangyimer kibong nem Tsüngremi anisüngzük aser tasütait mulungsentsü agüjang ta sarasademtsür. Asür tanüla teti tesunep nung anisüngzükangma, ta lenir-isa ashi.