T.R Zeliang-i azütokshitepba anentsü ayongzüker

Dimapur, November 27 (TYO): Nagaland Chief Minister, T.R Zeliang-i azütokshitepba anentsü aser mapang talangka melemtetteti aruba Naga yimten tebilemtsü khuret koktettsü atema tangatettep nung olemtep alitsü nüngdak, ta ashi.
Honibarnü Yangon, Myanmar nung Naga telok balala den ajurutepa sensaksemdang, T.R Zeliang-i Myanmar nung Naga nunger lennirtem dang NSCN (K) tanishir SS Khaplang den ajuruteptsü aser Naga nunger temeten jembitsü atema pa dang prangpong-injang toktsütsü atema ayongzüktsü mepishi, ta Media Cell, Chief Minister’s Office, Nagaland sangdong ka nung metetdaktsü.
Yashi Yangon Airport nung Naga Public Organisation, Naga Students’ Organisation, Naga Women Organisation aser arogo lennirtemi T.R Zeliang pela agizük.
T.R Zeliang-i Myanmar nung Naga nunger lennirtem dang Khaplang den ajuruteptsü aser Myanmar o India sorkartem den ceasefire tenangzüktep agitsü atema mesüzüktsü merangang ta mepishia liasü.
“Yangi Myanmar nung Naga nunger aser sorkar tsüngda yimjung lira, ni India Prime Minister den iba onük lemsateptsü aser pai yangi aser India nung Naga yimten tebilemtsü angatetteptsü atema Myanmar sorkar den tesentaktep yanglua mapa inyaktsü ta ni tamang akar” ta Nagaland Chief Minister-isa ashi.
Myanmar aser India arrtsü atsüdangtsü indang onük atema Naga nunger lennirtemi tebilemtsü lemsatepdang, T.R Zeliang-i ashiba agi, “India sorkar den iba onük lepshipet lepshia jembir aser arrtsü atsüdangtsü melena, Northeast kübok Myanmar den arrtsüa aliba tesemtem tali lapoktsüla, aji asünungdang metongjemi aliba tesemtem nung terenlok mapa inyaktettsü ta shia arur.”
“Bangladesh mesüra Pakistan linüktem den ama masü Myanmar aser India lushi naprong nung Naga nunger tesemtem lir. Anungji, item tesem atsüdangtsübaji tim masü. Anungji, Indo-Myanmar arrtsü ya Northeast nungi telungpurtem jenokdak tesem mekümdaktsütsüla” ta paisa Naga nunger lennirtem dang ashi.
“Iba tesem nung yimjung tensa lira, ni India sorkar dang gari lenmang aser tanga maparen inyaktsü atema jembitsü. Ibaji ajanga arrtsü anatsülen aliba Naga nungertem ajangzüktsü” ta Nagaland chief minister-isa shisem.
T.R Zeliang-isa India-Myanmar-Thailand Trilateral Highway yanglutsüba dak sendakba olen ka lemsatepdang, iba lenmang ya Putu 21 buba nung Southeast Asian region sendaktepba tongti lenmang asütsü, ta ashi.
Iba lenmang yagi Myanmar aser Thailand den North East India sendaktepba dang masü saka South East Asia den BBIN (Bangladesh – Bhutan – India – Nepal) sendakteptsü, ta paisa shisem.
“Iba highway ajanga rongsenkettsüng tsütsü mapa tulu inyaktettsü. Talisa, iba lenmang ajanga India kübok North-East aser Myanmar kübok North-West nung ali agi meketbanga aliba tesemtem lapoktsü” ta T.R Zeliang-isa metetdaktsü.
Deobar nikongtsütsü Yangon, Myanmar nung International Business Seminar nung o jembidang Nagaland Chief Minister-i iba onük jembi.
Iba sentong ya India-Myanmar-Thailand Motor Rally kübok shilem ka liasü aser sentong nung Chief Minister, Yangon Region, Government of Myanmar Phyo Min Thein, Secretary, Ministry of Road Transport & Highways, Government of India Sanjay Mitra, Ambassador of India to Myanmar Vikram Misri aser India o Myanmar nungi tongti ketdangsertem aika aden.
“Nagaland-i teyari aika agütsütsü koka lir. Nagaland indang educational network aser health care facility tem peria lir. Mapang talangka Myanmar nung alir aikati item teyari agia arur aser maneni agitsüla. Talisa iba ya ozü People to People contact policy den teputep lir” ta T.R Zeliang-isa ashi.
Noklak aser Mon ama arrtsü anasa aliba jilatem Longwa, Chen aser Pangsha ajanga Lahe aser Hkamti den sendakteptsü akok. Ano, Avangkhu ajanga Meluri aser Layshi aser ano Tamanthi sendakteptsü lenmang sadema lir. Item lenmang yanglutsü atema sen aika menüngdak aser item lenmangtem ajanga Asian Highway tajungba kümdaktsütsü, ta Nagaland Chief Minister-isa ashi.