T.R Zeliang-i CM residential office cum building yangludak semdang

Dimapur, May 18 (TYO) : Bodbarnü Nagaland Chief Minister T.R Zeliang-i Nagaland Legislative Assembly anasa tang teyangludak Chief Minister residential office cum building tesem semdang.

T.R Zeliang meina Forest, Environment & Climate Change Minister, Dr Neikiesalie Kire, Advisor to Chief Minister, Merentoshi R Jamir, Housing Parliamentary Secretary, Er Levi Rengma, Secretary & Commissioner Works & Housing, Himato Zhimomi, IFS, aser department nungi ketdangsertem aika liasü.

Iba mapang Chief Minister-i M/s NN Construction & Décor, Nagaland nungi contractor tem dang taküm küm tatemlen tembanga inyaktsü atema ayongzük.

2001 küm Sorkari New Secretariat nung Chief Minister indang Residential Office cum building yanglutsü telemtetba agi saka 2003 küm nungia acre 14 kimung nung iba mapa inyaktsü tenzük.

CM indang Residential Complex nung CM Residence, Office Building, VVIP Guest House, State Banquet Hall, staff quarters 47 units, security personnel & drivers Barracks, security fencing, lenmang, retaining walls, tetsüng lenmangtem dena lir.

Tang tashi nung iba mapa atema Rs 56.83 crore agütsüogo aser mapa noklang nung shilem 90 shi tembanga inyakogo. Tanüngba mapa inyaktsü atema Rs 31.09 crore shi sorkari agütsütsü atema mapa inyakdar aser iba sen ajanga taküm küm tatemlen mapa tembanga inyaktsü imlar.

Tanü Chief Minister-i contractor aser department ketdangsertem dang tekaratiba nung senotsü agütsütsü nangzük.