T.R. Zeliang-i kidanger state tem dang nungi teyari meshi

Dimapur, June 24 (TYO) : Naga yimten tebilemtsü angatettepba sülen Nagaland-a Sikkim mesüra Mizoram ama yimjung state ka akümtsü anungji kidanger state temi yariteptsü mepishir, ta Nagaland Chief Minister, T.R Zeliang-i ashi.
Yashi Guwahati nungi New Delhi-i apusoa maodang T.R Zeliang-i osangbener den jembidang ashiba agi, Naga yimten tebilemtsü koktetba sülen Nagaland state nung yimjung aser tesünep arutsü.
Iba onük atema kobi melii telemtetba ka agitsü ta Nagaland chief minister-i ashi aser paisa National Security Advisor Ajit Kumar Doval aser Interlocutor RN Ravi na den ajurutepa sensaksemba osang kar metetdaktsü, ta Media Cell, Chief Minister’s Office, Nagaland-i sangdong ka nung metetdaktsü.
Ajit Kumar Doval aser RN Ravi nati pa dang olemtep nung meputep balaka mali aser telok anaprongi iba khuret tekaratiba nung koktettsü atema telemtetba ka aginür ta ashi, ta T.R Zeliang-isa osangbener sen sensaksemdang ashi.
“Onoki Prime Minister ajurutsü atema mapang atar. PMO nungi aruba osang ajanga Prime Minister bendanglen nungi aruba sülen ajurutsü akok ta sangoktsüogo” ta paisa shisem.
North East Democratic Alliance (NEDA) senden nung adentsü atema Nagaland Chief Minister T.R. Zeliang Guwahati-i aruba liasü. Iba senden nung National BJP General Secretary (Adm) Ram Madhav aden.
Nagaland den kidanger state temi Nagaland nung yimten ken o angatettepa telungpur khuret agientsü atema yariteptsü tayongzükba agüjang ta senden nung T.R. Zeliang-i senden lennir aser NEDA convenor, Himanta Biswa Sarma dang mepishia metetdaktsü, ta Media Cell, CMO Nagaland sangdong nungsa shia lir.
Iba senden nung Arunachal Pradesh aser Assam Chief Minister tem aden aser taruba ita July tanabuba hopta nung NEDA formal süa tenzüktsü atema telemtetba agi.