T R Zeliang-i Naga lanurtem dang mapa inyakertem asütsü ayongzük

February 27, 2016 nü NBCC Convention Hall Kohima nung Nagaland Youth Summit 2016 alidang Nagaland Chief minister T R Zeliang, Lok Sabha MP Neiphiu Rio, Youth Net Director Hekani Jakhalu nunger den yimsüsürtem aser ketdangsertem külemi agiba noksa angur.

Kohima, February 27 (TYO) : Naga lanurtem dak sempet aliba ajanga Nagaland renloktsü aser tejakleni aotsü koka lir, saka asenok mapa inyaker peria mali, ta Nagaland Chief Minister, T R Zeliang-i tanü metetdaktsü.
“Asenok rongnung architects, engineers aser technical diploma holders aika lir saka construction worker tem mali” ta TR Zeliang-i Nagaland Youth Summit anogo ananübuba nung jembidang ashi.
Iba sentong ya YouthNet-i State sorkar teyari agia NBCC Convention Hall Kohima nung ayongzüka agi.
North East Region densema linük nung rongsenren tsütsü kanga dang ainba sector rongnung construction industry ya ka lir. Ajisüaka, asen state nung iba khuret ajuruba ajanga sorkari tetsükdaktsü ajurur aser construction workers ajungmesotsü atema State sorkari taküm ya “Year of Construction Workers” ta sangdongtsü mulunga lir, saka iba asoshi YouthNet-i nübo angutsü atema mapa inyaktsüla, ta TR Zeliang-isa metetdaktsü.
Centre mesüra state sorkari mapatong tongtipang ka inyaktsü tenzük nunga, asenok Naga nungertemi iba mapatongji tangar teyari medeni asen sasa meinyakteter. State kübok tesem balala nung ki asür aser gari lenmangtem yanglur, saka construction workers tembo tangalen nungiang arua item mapa inyaker, ta paisa shisem.
Tanga state tem nungi bendangertem asen state kübok tesem ajaklen arua alir aser iba ya ajanga tarutsü nung lendong bener arutsütsü aser ibaji tanü asenoki tanga north east state tem nung atalokba angur, ta TR Zeliang-isa ashi.
“Kisüdang mesüra lenmang yangludang amshiba osettem tatishitsü agi, cement, iron, steel, roofing materials, bitumen nunger amala tangalen nungi bener arur aser küm shia terenlok asoshi mapa inyakdang asenoki sen crore 3000 nungi 4000 endoker. Ajisüaka iba sen nungjagi shilem tera ka dang asen state nung anünger. Itemji contractor tem tajangzük tera anguba aser tax nung tera aruba dang lir. Tanüngba senji tangari bener aoer, anungji asenoki mapa inyakdang aser talisa tenlaki asüdanga tangalen nungiang mapa inyakertem anir aruba mapa inyakdaktsüba tangatetba ya khen süoki bilemtsüla, kechiyong iba tangatetba ajanga asenok azükaru malitsü” ta Nagaland chief minister-isa ashi.
Naga nunger mapa inyakertemia tangar den kasa mesüra tajungba inyaktettsü. Anungji Naga lanurtemi human resource development nung ongdang aliba süngdaktsütsü atema tebilemba lemsateptsüla. Iba khuret asoshi sorkari schemes mesüra missions atonga inyaktsü mulunga lir, ta paisa shisem.
“Skill India” aser “Make in India” atema jembidang TR Zeliang-isa ashiba agi, “Prime Minister Narendra Modi-i bendangertem arua mapa inyaktsü atema alima nem India lapoktsü.”
Iba tangatetba nung ajemdaker Naga nungertemia “Make in Nagaland” atema bilemtsüla, ta paisa shisem.