T.R. Zeliang-i Naga nunger longjemtsü ayongzük

Dimapur, November 17 (TYO) : Naga nunger longjemtsüla, tatok agütsütepla aser tesüiba tatalokbatem amar ajak ajungtsü atema külemi inyaktsüla, ta Nagaland Chief Minister T.R. Zeliang-i ashi.
Nagaland Peace Centre lapoker tanü, November 17, 2015 nü küm 50 ajungba jubileemung nung tongti tesemdanger o jembidang pai iba tayongzükba agütsü.
“August 3, 2015 nü India sorkar aser NSCN (IM) tsüngda “framework agreement” agiba sülen tanü Naga yimten tebilemtsü tensa tasen ka nung ajemokogo” ta TR Zeliang-isa ashi.
“Naga yimten otsü nung kanga dang tongtipang mapang ka nung, asenok tsüngda mangatettep alibatem angatetteptsüla aser tesüiba tatalokba atema tatok agütsüteper, külem ajungtsü aser nükjidong ka atema inyaktsüla” ta paisa ayongzük.
Iba dak sendakba nung Chief Minister-i ashiba agi, “Naga Peace Talk atema Interlocutor-i yimjung olemtep ya telok ka atema dang masü ta aiben lepshia shiogo. Nisung ajaki iba mapa nung shilem agitsüla aser Naga nunger ajak ajungtsü atema tebilembatem lemsateptsüla ta pai asenok dang shiogo.”
TR Zeliang-i Peace Centre indang tesüiba otsü bilemteta jembidang ashiba agi, “January 31 nungi February 2, 1964 tashi Wokha nung Baptist Church Convention agiba sülen 1964 küm ceasefire tenangzüktep agi.”
Iba mungdang nung Naga Peace Mission tentet aser iba nung nüngtugu lennir asem – Jayaprakash Narayan, Rev. Michael Scott, aser B.P. Chaliha züngsem liasü. Naga Peace Mission-i meranga inyakba aser Rev. Longri Ao lenisüba nung Baptist Church Convention-i sarasadem aser telemtetbatem ajanga nungita yariba sülen May 23, 1964 nü Phek district kübok Sakhaba yimtsüng nung India sorkar aser NNC tsüngda yimjung tenangzüktep agi. Ajisüaka, iba tenangzüktep ya September 6, 1964 nü ang officially sangdong, ta TR Zeliang-isa metetdaktsü.
Iba sülen Jayaprakash Narayan aser NBCC nungeri acha-ayanga Kohima nung Nagaland Peace Centre lapok aser tang amai “Ceasefire Monitoring Body” maliba mapang Nagaland Peace Centre-i ceasefire tenangzüktep agia aliba teloktem tiyongtsü nung mapa inyaka aru.
Ajisüaka, 1964 küm ceasefire tenangzüktep agiba mapang talangka melii raksatsüsa aküm aser Nagaland nung ozüng alema mapa inyakba aser azütokshiteptsü tenzük. Iba ama tensa tamajung ajuruaka Nagaland Peace Centre-i Nagaland nung yimjung bener arutsü atema mapa tajung inyakba manen. Iba denji külemi Nagaland Peace Centre-isa tetsürtem aser lokti nung sensakertem ajungkettsü atema mapa inyak. Item ajak asoshi ni parnok nem tenüngsang agütsür, ta TR Zeliang-isa ashi.
Tanü Hon jubileemung nung mendenji Rev Dr Chen Rengma Member, Governing Body Nagaland Peace Center liasü aser tongti tesemdanger TR Zeliang-i Jubilee Nüngo sayatsü.
Sentong nung asür Lhusi Haralu, Executive Director Nagaland Peace Center nem tetushi agütsüba mapang agi, Rev Dr Kethozelhou Keyho-i Tsüngrem o jembi aser Jubilee choir-i ken ka aten.