T.R Zeliang-i NE lennirtem ayongzük

January 29, 2019 nü Guwahati nung Citizenship (Amendment) Bill anema NE Regional Parties Convention nung agiba noksa angur.

Dimapur, January 29 (TYO): Citizenship Amendment Bill (CAB) anema Mongulbarnü North-East political party balala külem senden ka amenba nung Naga Peoples’ Front (NPF) tenüng nung taoba Nagaland Chief Minister T.R Zeliang, taoba Minister aser tang teinyakdak MLA tem- Imkong L. Imchen, Kuzholuzo Neinu, Y. Vikheho Swu, Yitachu, C.L John, Dr. Chumben Murry, NPF Working President Apong Pongener aser NPF Spokesperson Achumbemo Kikon nungertem aden.
Senden nung TR Zeliang-i jembidang “iba senden ya mapang shitak ka nung jatepa amener kechiyong tanü asenoki North-East tesem telongtet nung aser temalen nungi tetoktepertem anema raraba mapang ka lir” ta ashi.
CAB aser North East nung alirtem asoshi tebilembatem lemsatepba senden nung adener ajak dang kanga pelar kechiyong Lok Sabha nung iba bill agizükba ajanga NE ajungalen petsaprongteper. Iba ama mapang ka nung asenok ajak longjemer India sorkar dang North-East India-ibo CAB magizüker ta sayutsübaji kanga tongtipang lir, ta paisa ashi.
Nisung aikati Inner Line Permit (ILP) ajanga nübortem Citizenship Amendment Bill nungi kümzüka ayur ta bilemer saka ILP ajanga tangartem North-East State tem semdangtsü atema dang temelaba agütsü. ILP ajanga bendanger ka India nung küm 6 tashi lir senso agütsütsüba onük nung mekongshir,
Nagaland nung shishilembadak tongti Dimapur ya ILP ozüng kübok mali aser IBIs teimba sür ozüng alema aruba nisungtem aika arua alir. Dimapur nung dang masü saka Nagaland kübok tesem aika nung ozüng alema arurtem lir. Iba tatalokba ajanga BEFR 1873 mesüra ILP Regulations-i CAB nungi asenok kümzüka ayutsü ta meshitettsü.
Linük Temzüng nung Arrla 371(A) ajanga Nagaland nung sensotem CAB nungi kümzüka lir ta nisung kari ashir. Saka Arrla 371(A) ya Naga nunger tamangba mesüra inyaksangshi, sobaliba ozüng aser inyakyimtem, Naga customary law dak sendakba maparen aser ali kibur aser rongsen indang dang lateta lir. Iba ya CAB den kecha sendaktepa mali aser iba Arrla nung Senso akümba indang kecha shia mali. Anungji, Rajya Sabha nung CAB agizüka Act kümra Arrla 371(A) ajanga kecha mesütettsü aser kasaji to Assam Accord mesüra Mizo Accord-ia ajurutsü,
Nagaland sorkari Arrla 371(A) nung ajemdaker Petroleum & Natural Gas dak sendakba Rules & Regulations latetba tang okadak benoka lir. Anungji, asenoki kodaser Nagaland-i arur nem India senso magütsütettsü ta shitettsü? Anungji, asenoki tang CAB anema menokdakra, timtem tulu ajurutsü, ta  metetdaktsü.
Tanü ni Nagaland dak aketba nung ni Citizenship Amendment Bill (CAB) indang tebilemba lemsar aser NPF-ibo CAB magizüker aser anema noktaker. Anungji, yangi sentepa alirtemia North East nunger tarutsü asoshi CAB anema külemi longjemer ola adoktsü ayongzüker, ta