T R Zeliang-i NE lisopurtem sobaliba wazüka ayutsü ayongzük

UK aser Nagaland tsüngda tesentaktep tajungba akümtsü imlar : Alan Gemmell

Kohima, December 3 (TYO) : Nagaland Chief Minister, T.R Zeliang-i tanü North East nung alirtem ajak longjemer sobaliba wazüka ayutsü aser kümzüktsü atema mapa inyaktsü tayongzükba agütsü.
“North East nung lisopurtem nütsüng ishika dang aser asenoki asen sobaliba aser maitsü kümzüka meyura, nübo teimba aliba teloktemi asenok memetettsü aser akhüm metsübutsü” ta Angami Sports Association (ASA)-i ayongzükba lung atsüba sentong nung T.R Zeliang-i o jembidang ashi.
“Angami Sports Association-i Hornbill Festival den külemi iba sentong ayongzükba atema kanga pelar aser iba ya Angami nunger sobaliba nung jangratemtsü aketba sentong ka lir. Lung atsüba inyakyim ya akhidang nungi benshia aruba lir” ta paisa shisem.
T.R Zeliang-isa OBE, Minister Cultural Affairs, British Council India, Alan Gemmell pela agizüka jembidang, India nüjiso mangudang nungi Naga nungeri British sorkar den tesentaktep balaka liasü, ta ashi.
“India nüjiso anguba sülena, Naga nunger aser British sorkar tsüngda tesentaktep meraksai dang aru aser ibaji tanüa lir, talisa socio-educational development nung tesentaktep kanga junga lir” ta Nagaland Chief Minister-isa ashi.
Sentong nung Alan Gemmel-i o jembidang, “UK aser Nagaland nung alirtem tsüngda aika lemsateper aser talisa shisaliok, saisapong aser sobaliba nung lemsateper,” ta ashi.
2004 nungi Kohima Educational Society aser Kohima Educational Trust nati Nagaland nung lanurtem shisaluyimba nung teyari agüja arur aser taküm küm-a scholarships 153 agütsüogo, ta Alan Gemmel-isa shisem.
Sangkümji UK aser India tsüngda ‘Year of Cultural Exchange’ lir aser iba dak sendakba nung sangküm Hornbill Festival nung tesentaktep tali akangshitsü imlar, ta paisa metetdaktsü.