T.R Zeliang-i NPF candidate aser Mkg Div lenirtem den senden amen

Mokokchung, Tsüklai 17 (TYO): Naga People’s Front Mokokchung Division pur senden ka Küpdoknü par division office nung menogo. Iba senden nung Nagaland Chief Minister, T.R Zeliang den Mokokchung district kübok NPF candidate-tem aser division lenla balala nungi NPF lenirtem densema liasü.
Tanü iba senden nung T.R Zeliang-i jembidang, NPF ya Oct 21, 1963 nung tenzük aser iba party ya mezüngbo ‘Democratic Party of Nagaland’ ta sür tenzük. Iba party ya tongtibangsa yimden sabang ajanga Naga yimden tebilemtsü latettsü nükjidong yur tenzükba lir, ta ashi.
Paisa regional party aser national party na tebendang indang ashidang, regional party nungbo mapa/sentong ajak pei atep nung dang telemtetba agir, aji saka, national partybo telemtetba ajak temalen/azüklen nungi dang agir, ta metetdaktsü.
Paisa menden lemsatepba (seat sharing) indang jangjashitsüdang, tanga party den medemerbo yanglutsü akok, aji saka, menden lemsateptsüjibo asenok asoshi meputeper, iyongji BJP-i menden lemsateptsü asüngdangji magizük, ta ashi.
NPF-i yimsü asüdang, ochi mashi aser teraksa dang inyak aser NPF party ya mangdang makaba party, ta tanga party-temi jembir, “süra kobasa nungsa teraksa inyak, ibaji nüburtem dang tuteta sayutsüla”, ta paisa ashi. NPF-i aniba DAN sorkar mapang ‘mangdang 2030’ ta sür kaket ka adokogo, iba nungji ajemdaker maparen ajak inyaka aotsü, anungji, mangdang maka ta ashitsübaji madoker, ta paisa kuli kar shisem.
DAN 3 sorkar mapang mepetmesü aiben adokakasa, taoba mapang dang nungi terenlok mapa teimba inyakogo aser Mokokchung district nunga terenlok maparen aika tenzüka inyakdaki, ta paisa tang teinyakdak terenlok mapa kar tuteta ashi.
Kasa sentong nung Nuklutoshi, Imkong L Imchen, Dr. Benjongliba Aier, Dr. Ngangshi K Ao parnokia mapang tatsütsü agia jembia liasü.