T.R Zeliang-i tang mezüng NII Pilot Project tenzüktsü

Kohima, January 08 (TYO): January 6 nü Nagaland Civil Secretariat Conference Hall, Kohima nung Nagaland Chief Minister, T.R. Zeliang-i tang mezüngbuba National Information Infrastructure (NII) Pilot Project tenzüktsüogo; iba project ajanga Peren nung recognized village aser administrative headquarters shia nem Wireless Broadband Internet Service asem agütsür.
Iba sentong nung tongti tesemdanger o jembidang Chief Minister T.R Zeliang-i, IT&C Department-i ano alizüng ka tongtetba aser linük nung tang mezüng NII tenzükba atema tenüngsang agütsü.
Chief Minister-isa India sorkar MeitY Joint Secretary, Sanjiv Mittal IAS dang, state nung ano IT dak sentakba projects tali agizüktsü atema inyakdaktsüner, iba den külemi NII project kübok state nung districts ajak ayimjemdaktsüner, ta mepishi.
T.R. Zeliang-isa, state nung IT dak sentakba terenlok agütsüba atema IT Ministry dang pelaba metetdaktsü.
Chief Minister-i, lanurtemi iba technology tajungtiba nung amshia tajung akümba dang masü saka linük ainba nunga yaritsü imlar, ta ashi.
India sorkar tenüng nung jembidang MeitY Joint Secretary, Sanjiv Mittal IAS-i, nüngdakba ICT infrastruture atema renema aliba mezüngbuba state ji Nagaland-i ajangzüktetogo, ta ashi.
Paisa, state nung pilot project ajanga block 7, Gram Panchayats (GPs) 89 aser Peren district nung GPs tashi sorkar office 311 ayimjemer, ta metetdaktsü.
Paisa, banks asoshi wireless oset amenoktsü atema BSNL towers amshiogo ta shia BSNL-i amalitepa yariba atema pelaba shisem.
Paisa, Commissioner & Secretary, IT, KD Vizo aser par teloki iba project takok angutsü atema meranga inyakba asoshi tenüngsang agütsü. Kasa sentong nung IT&C Minister, P. Paiwang Konyak aser sentong lenir, Chief Secretary Nagaland Pankaj Kumar, IAS natia jembia liasüü.
Chief Minister-isa video conferencing ajanga DC, ADC’s, SDO (C) EACs aser yim Chairman den jembi.