T.R. Zeliang-i yimtsüng trok nung council hall sayatsü

Dimapur, Tsüklai/Feb. 18 (TYO): RURBAN mission 2017-2018 kübok Peren District nung yangluba yimtsüng trok nung council hall, Punglwa Mipui Ki ka, Northern Zeme GBs Union aser DBs EAC Ngwalwa joint Kitchen ka February 17, 2020 nü T.R. Zeliang-i semzüktsü. Iba sentong nung pa meina Er. Picto Shohe, MLA arua liasü. Yimtsüng trok ya . Punglwa-B, Gaili, Gaili Namdi, Heningkunglwa, Ngwalwa aser Nothern Zeme Council Hall, Ngwalwa Town alitsü.
Sentong nung adener den tajungshi o jembiba mapang Leader of Opposition ajanga ashiba agi, Ngwalwa Cluster kübok National RURBAN Mission takok ngua inyak, kong Heningkunglwa, Ngwalwa, Ngwalwa Hq, Gaili aser Punglwa yimtsüngtem lir. Pai nüburtem dang political party balala nung liaka terenlok asoshi lungjemer temulung agüja inyaktsü ajungshi.
Social media aser osangkaket balala nungi tangar aija aser luja mükazüi nüburtemi terenlok bener arutsü asoshi tokteptsüla. Koba political party sa tashi nung lidir liaka, ajak nükjidongji terenlok bener arutsü dak rangloktsüla aser koba party ajanga terenlok tali bener arur, ta tokteptsüla, ta pai ashi.
Zeliang-i ashiba agi, par party-i sorkar anir aliba mapang terenlok mapa inyakba agency mesüra department ketdangser shinga danga political party nung ajemdaker scheme aser project tem lemsatsü mashi. Political party balala nung liaka tesem ajunga nung terenlok bener arutsü asoshi pai ajungshi, ta ashi.
RURBAN sentong takok ngua inyaktetba ajanga nüburtem tali ajungmesotsü aser nüburtemi mapa inyakba agency tem den teka amteper yaritepra project aser scheme tali arutsü, ta pai teimla kaa ashi.
Yimtsüng trok nungi council chairman temia o tatsütsü jembi aser iba tesem iba amala scheme bener aruba asoshi T.R. Zeliang dang pelaba lemsatep. Peren District nungi iba mission ya tanga tesemi bener aotsü asoshi kanga meranga inyaktepaka nüburtem meimba ajanga T.R. Zeliang-i linük nung iba amala mission mezüngbuba ka ama Ngwala Circle nung anenoktsüsa inyaktet, ta chairman temi ashi.
Kasa sentong nung Er. Picto Shohe MLA, Kelie Zeliang, Comm & Secy. GoN, Azenou, PD DRDA Peren aser Iteising BDO Peren nungertemia o jembia liasü.