T.R.Zeliang melen Shurhozelie C.M asütsü

Kohima, Feb. 16 (TYO): Nagaland nung tang nübortemi akangba ama T.R.Zeliang chief minister menden nungi alutsü aser pa melen NPF tir Dr.Shurhozelie chief minister akümtsü lemtetogo ta Brehostibar aonung Parliamentary Affairs minister, Keyaneilie-i metetdaktsüogo.
Iba khuretji Dr.Shurhozelie agizükogo saka menden melentepa inyaktsübajibo T.R.Zeliang Delhi nungi meyipa arur külen dang inyaktsü. Pa asüng Hokolbar nüsa meyipa arutsü aser nikongdang tatartem ajak senden ka alitsü aser iba sülen dang sentong tejangja metetdaktsütsü ta paisa osangbenertem den jembidang metetdaktsü.
“Chief Minister TR Zeliang-i Brehostibar nü Nagaland Tribe Action Committee dangi züluba shidi ka nung pai CM menden nungi alutsü mulunga lir saka menden melentepa maparen timi agitettsü atema anogo ana semka agütsüdaktsüner ta mepishi nungji, Kohima nung February 17 nü lokti senden ayongzüka aliba aser iba sülen lumiba sentong agiyonga aotsü aliba sentongtem ajak anena atar, ta NTAC sangdong ka ajanga metetdaktsüogo.
Ajisüaka, tang government office melapokdaktsüi mokdangba aser government gari mesenzüdaktsüi nokdangba sentongtembo tang amai maneni aotsü ta NTAC aser JCC nati metetdaktsü.
Tang tashi nung nübortemi timtem jenti arema mokdangba nung shilem agiba asoshi pelar aser ano tatem tashi nokdaktsü mepishir ta parnokisa metetdaktsü.