T.R.Zeliang melen tanü CM tasen ka shimtsü

* Tanü nungi kaketreju aser shishilembadak lapoker,
* Govt. office melapokdaktsütsü, Govt. gari mesenzüdaktsütsü

Dimapur, Feb. 19 (TYO) : Nagaland chief minister, T.R.Zeliang-i pa CM menden nungi aluba shidi agütsüba, angh-i agizükadoker asünungji, pa melena ajaki mulungba nisung ka Chief minister asütsü atema shimtsü asoshi Hombar nü NPF Legislature Party senden ka State Banquet Hall, Kohima nung anepdang 10:00 ako nungi akatsü ayongzüka lir.
Iba senden sülen kasa tesem nung 11:00 ako nungi DAN Legislature Party senden ka akatsü, anungji tatar züngsem ajak medema arudaktsüner ta paisa mepishia metetdaktsü.
T.R.Zeliang chief minister menden nungi aluaka, ano pa memelen asünungji, ano Nagaland tesem ajaklen government office melapokdaktsütsü aser government gari mesenzüdaktsütsü, anungji district ajak nung Tribal hoho-temi akhi ama mokdangba sentongji takok ngua inyakdaktsüner ta Nagaland Tribes Action Committee sangdong ka ajanga metetdaktsüogo.
Ano, Dimapur nunga kaketreju aser shishilemba dakbo Hombar (Feb.20) nungi lapoktsü saka government office bo melapokdaktsütsü aser government garitema mesenzüdaktsütsü ta JCC sangdong ka ajanga metetdaktsü.
Deobar nü süaka, NTAC purtemi Kohima nung Nagaland governor ajurua memenu dangsa T.R.Zeliang CM menden nungi pai nangzükba ama aludaktsütsüla ta nenshia metetdaktsüba sülen T.R.Zeliang chief minister menden nungi aluogo.
“T.R. Zeliang CM menden nungi maluba ajanga nübortem kanga tipmatem kümdagi aser tensa mejungi kümogo, anungji item khu ajaki nai abentsü,” ta NTAC-i Nagaland angh dang shia liasü.