T.R.Zeliang okadaki ajar

Dimapur, January 18 (TYO): Nagaland Chief minister, T.R.Zeliangi pa election-i aitsü mapang tenüng agütsüba mapang pa tazüngba jenjang tiyazü agütsü ta aija okadak ken o agütsüba angadangtsü asoshi pa Judicial Magistrate First Class, Peren okadaki jaoka lir.
Wb.T.R.Zeliang tenüng ya tazüngba kuli kakettem nungbo Taditui Zeliang ta amshia lir aser iba nisung yabo NEHU kübok Kohima college nungi 1979 küm B.A. tatidang agütsü saka subject ajak nung tamakok angu aser 1980 kümbo B.A tatidangji magütsüba kuli tejangja nguogo, ta Jalukie town nung alir nisung ka tenüng agi K.K.Kulimbe-i metetdaktsü.
Iba nisungba yagi T.R.Zeliangi pa B.A majang ser nung ajangogo ta election mapang pa tenüng agütsüdang metetdaktsüba osang angashia RTI ozüng ajanga Kohima College nungi July 24, 2015 nü meshi aser iba telangzübaji July 28 nü angu ta metetdaktsü.
Atangji, election nung tokteptsü atema tazüngba jenjang balaka menüngdaker saka yimsüsür kati pei tazüngba jenjang tiyazü agütsübaji tai aser nübortem mezüngmeshiba mapa ka asütsü ta okadak iba ken o benoksang Kulimbei metetdaktsü.
Iba ken o nung okadak nungi ochi obendang angutsü imlar aser nübortemia aibelener anema ochi obendang angutsüsa yaridaktsüner, ta Kulimbe-isa mepishia metetdaktsüogo.