T.R.Zeliangi taruba election nunga NPF sorkarsa arutsü imlar

NAGA PEOPLE’S FRONT (NPF) WEBSITE SAYAOGO

Kohima, September 28 (TYO): 2018 Assembly elections sülena Nagaland nung NPF-i aniba DAN sorkarsa arutsü, anungji party mapa inyakertem masetshii noktakang aser pei akokba tashi nübortem tenzükang, ta Nagaland Chief Minister, T R Zeliang-i ayongzük.

“Ita ishika lir külen, asenoki Election maparen tenzüktsü aser iba mapang asenoki State asoshi inyaktsübatem metetdaktsütsüla. Itemji sangküm küm tom ka nung sangdongtsü” ta pai ashi.

Naga People’s Front (NPF)-i Central Headquarters, Kohima nung Press Secretaries atema one-day seminar-cum-workshop nung T.R Zeliang-i iba onük jembi.

“Nisung kari social media sites nung mapang aser tashi ajak endoka NPF party sorkar anema tebilembatem lemsateper. Iba nung party mapa inyakertema ajemoka sorkari mapa tajung inyakbatem metetdaktsütsü merangtsüla,” ta paisa ayongzük.

TR Zeliang-isa NPF MLA tem indang Press Secretary tem dang, “akokba tashi tanga party mesüra kijatem meyirutsüsa osangtem sangdongtsüla aser teti ochishia, tejak mereprangi osangtem sangoktsütsüla” ta ayongzük.

“Party mesüra sorkar anema jembiba onüktem ajanga asenok mulungsentsü memenendaktsütsüla saka Party tangatetba aser tetuyubatem nungi mepilai inyaksangshitsüla” ta Chief Minister-isa shisem.

Tanü sentong nung T.R Zeliang-isa Naga People Front (NPF) website sayatsü. Tang nungi nisungtemi www.npfweb.org nung NPF party indang maparen aser putiotsü metettsü akok.

NPF party indang putiotsü nung party website lapokba ya kanga dang tongtipang mapa ka lir. Iba ajanga NPF global map-i iogo aser joko alima ajungai party maparen aser inyakyim reprangtsü akok, ta chief minister-i ashi.

Sentong nung NPF President, Dr Shurhozelie-ia o jembidang ashiba agi, India nung democratic inyakyim nung journalism mapa inyaker.

“Asenok press indang talenba kecha mali aser iba jagi journalism ajanga public dang  osang ajak sapoka metetdaktsür” ta pai ashi.

Dr Shurhozelie-isa ashiba, “Local osangkakettem nung adokba osangtem ajanga asen state indang noksa alima dang sayur.”

Iba atema Nagaland nung aliba media house temi alima dang Nagaland indang noksa tajung sayutsü atema osang tajungtem adoktsü mepishir, ta paisa shisem.

Iba sentong nung panelist temji – NPF Working President Apong Pongener, Ramietech IT Solution CEO Kedousietuo Nagi, KPC president Xavier Rutsa den KPC züngsemtem- Emilo Konyak aser H. Chishi na liasü.

Sentong nung mendenji Associate press secretary NPF Central, Sebastian Zumvu liasü aser sensaksemba mapang onirji Associate press secretary Pushika Awomi liasü.