T. Senka-i züluba yimdangjem otsü ‘Teronem Taku’ kaket sayaogo

Mokokchung, July 3 (TYO): Nüngtugu Ao kaketzülur aser taoba Ao Milen yimozülur Wb. T. Senka Ao-i züluba kaket ka tenüng agi “Teronem Taku” ta sür Hombarnü Ongpangkong Watsü Mungdang tir Wt. Talichula-i yangi OWM office nung meraketa sayatsüogo.
T. Senka Ao asoshi tang adokba kaket ya zünga kaket ti (8) buba asütsü. Tang züluba ‘Teronem Taku’ kaket ya yimdangjem (fiction) otsütem dang lir. Iba kaket nung jangratemtsü otsü 15 keta lir aser kaket nung Tir Yimyim yimozülur K. Temjen Jamir-i omasa züluja lir aser Research and Publication, TDCC, Hon. Director Dr. L. Imsütoshi Jamir-ia publisher nungi osemlok zülutsüba angutsü.
Kaketzüluri mapang tatsüka agidang, kaket ajanga kin/linük ka jenjang sayur, anungji, kaket peria zülutsüla aser iba atemaji kaket zülurtem ajungshitsüla, ta T. Senka Ao-i ashi.
School nung tazüngtsü kaket peria mali, anungji, Aori sangro kaket, jilushi aser yimdangjem kakettem peria zülutsüla. Aji oda, tsüraburtemia pei chirnur dang pei oshi meima jembitsüla, sayutsüla, azüngtsü ajungshitsüla, ta pai inyakdaktsünüba o ka ashi.
Oshiji sobaliba aser oshi samara sobaliba tesama, ta pai tetsü oshi wazüka ayutsü asoshi ashi. Aor yim shia nung o tajung aika lir, itemji bushia bendentsüla aser kaketkeno rendaktsüba maparen nung amshitsü asoshi paisa shisema liasü.
Talinürtemi iba kaket ya Ongpangkong Watsü Mungdang office nungi senpak 300/- yong angutsü.