T20 League nungi sen million 2.6 tajangzük nguogo: Pakistan

Islamabad, May 05 (Agencies): Pakistan-i mezüngsüa ayonga asayaba Twenty20 (T20) cricket asyamong nungi dollar sen million 2.6 tashi ajangzükba osang ka Pakistan Super League (PSL) mendenbuba, Najam Sethi-i metetdaktsüogo.
Kiralongrartemi Pakistan nung cricket asayatsü asoshi aruba Sri Lanka telok Lahore yimti nung 2009 küm kaseta lendong atalokdaktsüba sülen Pakistan cricket jenjang kanga mejungi aküm aser kasaji tajungba kümdaktsütsü nükjidong nung United Arab Emirates (UAE) nung taküm February ita ayongba T20 asayamong nung telok 5 tashi shilem agia liasü.
“Tan mezüngsüa ayongba T20 asayamong nungi dollar sen million 2.6 tajangzük angu saka iba asayamong nung shilem agir teloktemi takoksa anguba yong parnok nem sen million 2 agütsüba sülen maneni sen 0.6 tajangzük ngua liasü,” ta Sethi-i osang jangjashitsü.
1 buba PSL asayamong nung Chris Gayle, Darren Sammy, Shane Watson, Kevin Pietersen, Luke Wright aser Shakib Al Hasan nunger densemba Islamabad teloki Quetta telok final asaya nung tsükdakja takok marok agizüka liasü.
“1 buba PSL asayamong takok tulu ngua asayaogo aser taruba kümbo telok  talila 1 anioksema ajak agi telok 6-i shilem agitsü sentong renema lir,” ta Sethi-i metetdaktsü.
India nung ayongba Indian Premier League (IPL) cricket asayamongi India’er cricket asayartem yariba ama, PSL asayaba ajanga Pakistan’er cricket asayartem indang jenjanga tajungba kümdaktsütsü imlaba olen ka paisa metetdaktsüogo.