T20 Series: India tsürtemi Australia madak tanabuba asaya akok

Melbourne, January 29 (Agencies): India’er tetsür cricket asayar teloki wicket 10 agi world champions, Australia telok madak tang par telok ana tsüngda tasayadak asaya 3 densemba Twenty20 (T20) series asaya 2 buba tanü, Hokolbar nü kokogo.
Taoba asaya akokba densema, India teloki tan agi asaya tanabuba atonga akokba sülen par teloki points 2-0 ngua tang tasayadak T20 series asayaji akoktsü jenjang angur lir.
Australia wicket ajunga over 18 buba nung laoa par teloki ajak agi runs 125 yanglu saka India captain, Mithali Raj aser Smriti Mandhana nati runs 37 aser 22 yangluba densema, par teloki Australia asayartemi yangluba runs ajangteta tanü asayaji kokadok.
Tanü asaya nung overs 4 nung runs 16 agütsüba den wicket 2 agila, India tsür, Jhulan Goswami Player of the Match shima liasü.
Ano külen, India’er tebur cricket telokia runs 27 agi Australia 2 buba T20 asaya nung tanü takok ngua points 2-0 agi temaba jenjang nguogo.
Rohit Sharma, Virat Kohli aser Shikhar Dhawan nungeri runs 60, 59 aser 42 yangluba densema, par India teloki overs 20 nung runs 184 yanglu.
Tesülen, Australia asayartemi overs 20 nung runs 157 dang yangluteta tanü asaya nung tamakok ajuru.
Par telok anati tatembangba asaya tan Deobar nü Sydney nung asayatsü.