T20 Series: India’er tetsür o tebur cricket telok nati Australia akok

Team India-i Australia madak 1 buba T20 asaya Adelaide nung akokba sülen pelatepba noksa nung angur. (Adelaide, January 26)

Adelaide, January 26 (Agencies): India’er tetsür cricket teloki wicket 5 agi world champions, Australia tsür madak asaya 3 densemba Twenty20 (T20) International series tetenzükba asaya tanü Mongolbar nü kokogo.
Australia telok nem ajak agi runs 141 agidaktsüba sülen Harmanpreet Kaur, Smriti Mandhana aser Veda Krishnamurthy nungeri runs 46, 29 aser 36 yangluba densema, India’er tetsür teloki overs 18.4 nung Australia teloki yangluba runs ajangteta tanü takok angu.
Par telok anati Melbourne aser Sydney na nung tanüngba T20 asaya 2 asayaba sülen maneni asaya 3 densemba One-Day International (ODI) series taruba February ita asayatsü ayonga lir.
Ano külen, tan mezüngsüa shilem agisang, Hardik Pandya-i hat-trick yangluba den külemi, spinners Ravichandran Ashwin o Ravindra Jadeja nati wicket anana agiba ajanga India’er tebur telokia runs 37 agi Australia telok madak tetenzükba T20 asaya tanü kokogo.
Virat Kohli, Suresh Raina aser Rohit Sharma nungeri runs 90, 41 aser 31 yangluba densema, India teloki ajak agi runs 188 tashi tanü yanglua liasü.
Tanü asaya nung four 9 aser six 2 yanglusang, Kohli Man of the Match shim.
Par telok anati tanabuba T20 asaya Melbourne nung tan Hokolbar nü asayatsü.
Ano, India teloki küm 4 ser tesadang ka shi nung tan mezüngsüa International Cricket Council (ICC) Test tarensen nung temaba jenjang anguba osanga jangjaogo.
England teloki points 2-1 agi temaba jenjang nung alir, South Africa madak Test series akokba ajanga ajak agi points 110 ngua aliba India teloki temaba jenjangji ajangzük.
4 Buba Test asaya nung S Africa teloki runs 280 agi England madak takok angu saka par teloki taoba asayatem nung tamakok ajuruba yong temaba jenjangji toktsütsüsa küma tang 3 buba jenjang tonga luogo.