T20 Series nung India-i 3-0 agi Australia madak takok angu

Sydney, January 31 (Agencies): Tan India aser Australia na tsüngda T20 series asayaba nung asembenprongla India-i kokogo. Australia ali nung India nungeri runs timtiba arshia akokbaji tanü, January 31, 2016 nü mezüng lir.
Tanü takok anguba ajanga India cricket team-i ICC T20 nung temaba jenjangi tongtetogo.
2010 küm Sri Lanka den Rajkot nung asayadang India-i runs 202 arishia akokba sülenbo tan ya tanabuba timtiba runs 198 arishi akokerba lir.
Iba asaya nung tesüsabuba ball trok aontsü anünga alidang India nungeri akoktsü asoshi runs 17 nüngdaka liasü.
Tesüsabuba over nung ball pongu anünga lia India nunger runs 13 nüngdaka liasü, ajisüaka Yuvraj-i six ka azükba ajanga ball pezü nungi runs 7 angutsü tonga bener alutet. Iba sülen run ka asema ball asem nungi runs trok angu nung akoktsü mapangi bener aru. Raina-i ball ana nung runs anana angu aser tesüsaba ball nung runs pezü anguba ajanga iba takok angu.
Iba asaya nung Suresh Raina-i runs 49 (not out) yanglu aser Yuvraj Singh-i runs 15 (not out) yangluteta.
Kasa asaya nung Australia nungi Shane Watson-i ball 71 nung runs 124 yanglu.
Ano Februay 9 nü Pune nung India aser Sri Lanka na tsüngda asayatsü sentong lir.