T20I: India-i points 2-1 agi Zimbabwe telok akok

Harare, June 22 (Agencies): Zimbabwe kübok Harare nung asayaba tasembuba aser tatembangba Twenty20 International (T20I) asaya runs 3 agi akokba sülen India teloki points 2-1 agi Zimbabwe telok madak asaya 3 densemba T20I series asaya tanü, Bodbar nü kokogo.
Kedar Jadhav-i ball 42 nung runs 58 yangluba den Mandeep Singh, Jadhav aser Ambati Rayudu nungeri runs 31, 20 aser 20 yangluba densema, par India teloki tanü asaya nung wicket 6 laoa ajak agi runs 138 yanglu.
Tesülen, Elton Chigumbura, Timycen Maruma, Vusi Sibanda  aser Hamilton Masakadza nungeri runs 16, 23, 28 aser 15 yangluba densema, Zimbabwe teloki kanga meranga asaya saka par wicket 6 laoa ajak agi runs 135 dang yanglutetba yong tanü tamakok ajurua series asaya makoktsüsa jenjang tamajung angu.
India teloki taoba hopta asayaba One-Day Internationals (ODIs) series-a points 3-0 agi Zimbabwe madak takok ngua liasü saka tan T20I series-bo kanga timtemang akoker lir.
Ano külen, tan asaya nung shilem agiba sülen India Captain, M S Dhoni-i Australia nunger Ricky Ponting-i yangluba international asaya 324 tashi nung captain ama shilem agiba otsü menepogo.
2007 küm nungi tenzüka India captain menden abensang, Dhoni lenisüba kübok India teloki Test asaya 60, ODIs 194 aser T20 Internationals 70 tashi nung takok ngua lir.