Tabensa Kaket Ka (T.Ken 119:121-128)

Tanü kaket zülur aika akümer. Kari kaket aika zülur, kari ishika dang zülur. Kari kaket tulu zülur, kari tila zülur saka shingaia pei züluba kaketji tabensa ta mashir. Kaket ka dang tabensa kaket lir aser ibaji Tsüngrem O. Iba yongji ken züluri ya zülu, “Aji asünung kechisarena nung ne temelaba ozüng ajak shitak ta ni züngshir; aser tiyazü lemang ajak ni sempar” (t.128). Laishiba ajungaji apuoktsüba O lir. Iba tetezü Tsüngremi apuoktsü. “Laishiba ajungaji Tsüngremi apuoktsü, aser tajangzük lir” (2Timo.3:16). Apuoktsübaji sayatenya ka lir. Tsüngrem tanela ajanga Mosa, Isaia, Mathi, Mark,Paul aser tangar den jembi aser ajaki zülu. Aji saka ibaji Tsüngrem O lir.
Tsüngrem O nung aibelen mali ta bilemtetang. Ibai ajak ochi. Laishibai ashiba otsüji shitak. Laii ashiba shin o ji shitak. Science indang iba yagi kechi ashir aji shitak. Nisung shisatsü agi asenoki Laishiba tendangtsü makok. Asenoki nisung shisatsü Laishiba ajanga tendangtsü akok. Iba tetezü asenoki Laishiba O agi taküm alir. Yisui ashi, “Asenoki Tsüngrem bang nung agi adokba O shia agi taküm alitsü” (Mathi4:4). O shia nai Tsüngrem O ajungaji mezüngra kechi sentoker? Kechiaser Laishibaji apuoktsüba O aser atangji asenoki iba dangi or ashitsü akok, “Kibuba, ni kechi inyaktsü?” Pai asenok dang langzütsü.
Laishibaji sayatenya kaket ka lir kechiaser ibai Tsüngremi apuoktsü. Iba shisatsü aser ochi ajanga taküm liang. Kodang nai ibai agizükdir aser tashi angadir, iba yagi na sayatenya taküm ka dangi anitsü.