Tabensa Liang

“Anungji nenok kotaker Tebu koda tabensa lir, yamaji nenoka tabensa liang.” Mathi 5:48

Greek oshi nung ‘telios’ ta asüba tetezüji mapa tembanga inyatetba, shisatsü nung tain akümba, takok nung temtetba. Aser iba oji asen Ao Laishiba nung tabensa ta meyipzüktsür. Aiben iba lai tekong ya, khrista dak temenen maliji asenok daka takta temenen malitsüla ta sa rateta jembir. Saka asenok meimchir asoshi aji tamakoktsü lir.

Yisu shinübajibo, asenoki tekong 43 nungi züngra tajungba angatettsü. Tebu Tsüngremi koda tebendang makai alima ajunga meim, aser iba atemaji Techiri pei taküm bendanga agütsü, yamaji asenokia pei kiyonger meimtsü, tsükchir meimtsü jembia lir. “kechi koda nenok tebu yimlibilem lir, yamaji nenoka yimlibilem liang” (Luk 6:36)

Aseni pei meimnüba nisung dang meimba aser yimlibilem sayubaji masü saka tamajunger tsüngdanga kasa taochi amshiba ajangaji asen mapaji tabensa kümdaktsür. Aser yamala inyakba ajangji asenok pa ama abensaa inyakbapur akümer. Iba amai kibuba tsüngsü nung anitakba jagi asenok tabensa kümdaktsür.

Sarasadem: Tulusang Tsüngrem, na ama tabensa akümtsü ni merangdi, Nai ni yariangma. Amen.