Taekwondo nung RMSA-Self defense sentong tembangogo

RMSA tesayurtem Taekwondo training agiba noksa nung angur. 

Kohima, Rongchii 13 (TYO): Nagaland Taekwondo Association (NTA)-i achaayanga Taekwondo nung RMSA self defense martial arts training (2017-18) mezüngbuba shilem Yangtepnü nikongtsütsü IG Stadium, Kohima nung tembangogo.
Sentong tatembangba nung o jembidang RMSA Mission Director Limawabang-i tesayurtem dang pei school nung maneni kaketshirtem dang parnok angazükba tem sayutsü asoshi ajungshi. Iba sülen pai coach aser tesayurtemnem kuli kakettem lemja liasü.
RMSA Joint Mission Director Dr.Kevi Rio-i, RMSA self defense martial arts training program nung tetsür tesayurtem aikati shilem agiba ngua temulung achiba lemsatep.
Tetsürtem rongnungi tajungtilaji Dimapur district, GHS Piphema, nungi Easter Ayemi nem agütsü aser teburtem rongnungi Kohima district kübok GHS, Kigwema nungi tesayur Neingu Yhokha nem agütsü.
Tetsürtem rongnungi best upcoming trainee teacher award Kohima district, GHS Sakhabama nungi tesayur Sevosalii Shijoh nem agütsü aser teburtem rongnungi Mokokchung district kübok GHS, Unger nungi tesayur Nuchikho Rhakho nem agütsü.
Iba training nung shilem agir tesayurtem ajak nem shilem tajung agiba atema kuli kaket agütsü. Iba sentong nung Kohima, Dimapur, Mokokchung, Peren aser Wokha nung tesayur ajak agi parnok 82-i shilem agi. Iba sentong tanabuba shilem Rongchii (April) 17 nungi 22 tashi agitsü.
Kasa mapang nung RMSA kübok secondary tesayur tasentem Induction Training Nagaland Board of School Education Office nung Rongchii (April) 10 nü nungi kaa liasü.
Training tenzükba mezüngbuba anogo nung Sr. Academic Officer, NBSE-i tesayurtem ajak pelashishia agizük aser training agiba nükjidongji tesayurtem temi parnok shilem aser khurettem angazükdaktsütsüba aser Government servant ka ama temzüng ozüng balala jangjashitsüba atema lir, ta ashi.
Training nung Resource Person, Pheluopfelie Kesiezie-i tesayur ka tinyaktsü aser khurettem lemsatepba den parnok dang khuret angateta bendanga agüja inyaktsü ajungshi.
Administrative Training Institute, Kohima nungi Resource Person, Hovithal Sothu-i Nagaland Government Servant Conduct Rules 1968 onük nung tesayuba agütsü. Resource person-i tesayurtem dang parnok mapa ya kaketshirtem taküm melenshidaktsütsü asoshi mission ka ama agizüka inyaktsü mepishi.
Training tatembangbuba anogo nung Additional Secretary, NBSE Rangumbuing Nsarangbe-i Board-i examination reforms, Grading system aser Continuous & Comprehensive Evaluation (CCE) inyakyim indang nung ajemdaker jembi. Maneni tesayurtem dang question kanga junga set asütsüba aser question paper indang blueprint yanglutsüba dak sendakba nung tesayuba agütsü.