Taekwondo referee tem training kaogo

Kohima, September 26 (TYO): Mongolbarnü, IG Stadium Multi Purpose hall nung anogo ka atema Nagaland Taekwondo Association (NTA) kübok referee tem atema clinic ka kaogo. Iba sentong nung International Referee Joseph Thangsanga trainer liasü.
NTA General secretary Lhouliebeio Khezhie-i, tetsür aser tebur jenjang balala nung state championship Bodhbarnü aser Brehostibarnü asayatsü, ta sangdongogo. “Iba asayamung nung asayar 300 nungi 350 tashikati shilem agitsü aser district balala nungi ketdangsertema iba championships nung shilem agitsü,” ta paisa ashi.
Nagaland Taekwondo Association (NTA) -i ayongzükba 30buba State Taekwondo championship, IG Stadium Multi Purpose hall nung Bodhbarnü (September 27) 10:00 ako nungi tenzüktsü. Asayamung lapokba sentong nung parliamentary secretary Youth Resources and Sports Khekhaho Assumi tongti tesemdanger asütsü. Maneni sentong nung lokti pelaa agizükba o NTA tir, Pele Khezhie-i jembitsü aser iba sülen asayamung tenzüktsü.