Taginüba nung masü nüngdakba nung rangloktsüla: Minister Imna Along

Dimapur, Rongjui/September 13 (TYO): Higher & Technical Education & Tribal Affairs Minitser, Temjen Imna Along Longkumer-i, asenoki aginüba nung masü saka nüngdakba nungang rangloktsü atema mapang tongogo, ibaji ajangadang loktiliba nung temelenshi bener arutsü, ta metetdaktsü.
Hokolbarnü Pranabananda Women’s College pur 28buba Freshers’ social & annual sentong nung jembidang Minister-i, “Asenoki temelenshi aginüra pei dak nungi tama tenzüktsüla. Kaketshirtemi takok angutsü atema nükjidong yur nendaka inyaktsüla,” ta ashi.
Paisa kaketshirtem dang, kaketshisatsü bushiba mapang nungsa taküm akhümketa litettsüsa libaliro tajung benshitsüla, ta ashi.
Tesülen Minister-i college magazine “Pranab vision” sayaja liasü.
Kasa sentong nung Dimapur Deputy Commissioner (DC), Kevekha Kevin Zehol-ia kaketshirtem dang nükjidong yur meranga inyaktsü ayongzüka liasü.