Tagütsür Bilemtetang (T.Ken 107:32-33)

Khristantemi mapang tajung nung dang jangratema alitsü bilembaji lendong tulu lir. Kodang asenoki Tsüngrem dak masü mapang tajung nung dang metaloker aliba Tsüngremi angur Pai mapangji melenshitsür. “Pai ayongtem lisem li kümdaktsür, aser tzü ayongtem tzüraba li kümdaktsür, temo aliba li metsü li kümdaktsür, kechiyong yangji shiba ali, parnok tamajung mapa yong lir. Pai arem agi tzü nung azü kümdaktsü, aser ali takong agi tzü ayong kümdaktsür. Aser yangji yaseta alir Pai lidaktsür, angji parnoki talitsü yimti yanglu” (t.33-36).
“Asenok item tesüngmangtsü ayongtem aser ayongnu kar. Asenok item süngjang atangba litem kar. Asenoki chidi, jemdi aser pelaa lidi” ta nai ashitsü akok. Saka Tsüngremi ashir, “Minute ka ataang. Nenoki sempettemji pela agir aser tagütsüsang amadoker asü? Nenoki kü teka repranger aser kü mulungjang amadoker asü? Nenoki kü rongsen nung pelar saka Ni mulungba sentoker asü?”
Yamaji teti ataloker- asenoki süngyanglu dangi meyiper. Asenoki temelentep nung alitsü tenzüker. Ayongtem aser ayongnutem aser süngjang atangba li asenok Tsüngrem kümdaktsür. Pai ayongnu tzütemji shibanger. Pai ali temo alibaji lisem li kümdaktsür. Idangji asenoki ayimtener, ” O Tsüngrem, onoki kechi inyaktsü?” Pa telangzübaji, “Nenok temoatsütem külemba dang nungi Ni külemtsü tenzükang. Temoatsü nung masü temoatsür dak reprangtsü tenzükang. Süngyanglu tekülem. Ne nem tajung ajak agütsüba asoshi Kü tenüng sangang.” Shisa kaa liang. “Shir shisa aka, item mapa nung temulung agütsüdakjang, aser parnoki Kibuba yimlibilem indang shisadangtsü” (t.43).
Na alima nung metaloker lidaktsütsü satani pa tajungtiba agi inyaktsü. Kodang pai takok ngudir, nai Tsüngrem amadoktsü aser ne rongsen dak temulung alemtsü. Nai jangratema bilemtsü akok. Item asoshi Tsüngrem tenüng sangang; saka maneni ne tanelaren tashi Tsüngrem nungi agiang. Tsüngrem temoatsü ayongtem ne nem agütsüba shibangadokra, Pa külemtsü tenzükang.