Tai Ahom nungertemi NRC nung züluoktsü akhanger

Guwahati, July 19 (Agencies) : Assam nung Tai Ahom nunger lennirtemi ashiba agi National Register of Citizens (NRC) nung lisopurtem kulikaket mesüra parnoki tetsütebouren mereprangi dang anioktsüla ta metetdaktsü.
“Lisopurtemji state nung telidakpurtem lir anungji parnok kodaser kulikaket agüja senso jangjashitsü? NRC jagi bendangertem tenüng meinoktsü atema dang reprangtsüla. Kin balala aser lisopurtem ajak NRC nung züluoktsüla. Parnok tetsütebouren mereprangtsüla” ta All Tai Ahom Students’ Union (ATASU) tir, Pranjal Rajkonwar-i ashi.
ATASU lenisüba nung scheduled tribe (ST) jenjang agütsütsü atema takhangba agüja mapa ka inyaka arur.
1826 küm Britain nunger East India Company aser Burma tsüngda Yandabo treaty tenangzüktep magidang nungi Assam nung alir nungi jakzüker ajak NRC nung züluoktsüla ta parnoki akhanger.
Nisung kar ket nung pan cards, ali kulikaket mesüra tanga kulikakettem mali, süra parnokbo NRC nung medendaktsütsü asü? ta ATASU tir-isa ashi.
Paisa ashiba agi, taküm October tashi nung Narendra Modi-i aniba sorkar ST jenjang magütsüra, ATASU-i Assam nung BJP anema lungkak aittsü.
Assam nung kin troki ST jenjang meshiba rongnung Tai Ahom pur dena lir. Tanüngba kintemji Koch Rajbongshi, Moran, Motak, Adivasi (süngolu ayimertem nungi jakzükba) aser Chutia nungertem lir.
“Lok Sabha election magidang BJP-i ozü kin lennirtemi arur ST jenjang agütsütsü ta nangzük. Iba sülen küm ka süiogo saka Modi’er sorkari kecha meinyak. Assam nungi BJP MP tenet dang onoki mepelar” ta Rajkonwar-isa ashi.
July 28, 2015 nungi ATASU-i district shia nung lungkak aitba sentong ka ka agitsü aser August 10 nü Dispur last gate nung sentong ka ayongzüktsü.
Taküm October ita nung parnokisa Delhi kübok Jantar Mantar nung sentong ka agitsü, ta ATASU tirisa ashi.