Tai maketba Khristan pur 7 chioktsü akanger

Dimapur, April 02 (TYO): 2008 küm Odisha state kübok Kandhamal ta ajaba tesem ka nung Hindu nunger putir ka tenüng agi, Swami Laxmanananda Saraswati tepsetba maparen nung tai maketba Khristan pur tenet taküm piyong asoshi puoka alibaji chioktsü atema osangbener aser kaket zülur, Wb. Anto Akkara-i ‘Online signature campaign’ ka tenzükogo.
Iba shidi nung ya internet ajanga www.release7innocents.com nung lapoker, temulunger shiai sign asütsü akok aser kodang sign südir idangjisa email ajanga Chief Justice of India, President of India, National Human Rights Commission aser Chief Justice of Odisha High Court dangi iba shidiji aotsü.
Arishi küm 81 tain Swami Laxmanananda Saraswati ya August 23, 2008 aonung nisung kari tepsetba sülen Hindu nungertemi pa mangji bener anogo ana tashi Khristan purtem aliba tesem bushia oagi parnok taliba ki aser tenla ki rongdoktsüba ajanga nisung meyirjang 50 dak tali talidak ki makai arem nung jenoktsüsa aküm, ta Anto-isa metetdaktsü.
Iba mapang Kandhamal nung Hindu nungertemi Khristan purtem reshikangshiba, tepsetba aser kiojen raksatsür talidak maka arem nung jenokba tatalokbatem bendena yangluba video noksa ka Mongolbarnü yangi Dimapur nung sayua liasü. Ibai minute 17 reprangtsüsa yangluba ‘Innocents Imprisoned’ ta ser documentary film ka lir.
“Iba noksa ya Kandhamal nung atalokba maparen nung ochi obendang magütsüi inyakba indang social media ajanga linük nem angatetdaktsütsü merangba mapa ka lir,” ta iba video yanglusang Anto-i metetdaktsü.
Iba video noksa ya tai maketba Khristan pur par tenet tepuokdak yur küm ter ajungba anogo bilemteta taoba mapang Delhi nunga sayaogo. Iba kasa video ya www.release7innocents.com – website nung angutsü.
Swami Laxmanananda tepsetba ya Hindu nunger Sang Parivar teloki Hindu nunger mazüng memetetertem dang Khristan purtemi tepset ta shir pa mangji bener Khristan purtem dak mangyangdakja senzüdaktsü.
Iba mapang Khristan pur tanaben Hindu yimsü magizükertembo taküm rongseta südaktsü aser kar temangbo anüka lepsatsü. Iba lendong nung Khristan pur 100 shi tepset, tenla ki 300 den taliba ki 6000 shi tanük kümtsü aser rongdoktsü, ta Anto-isa ashi.
Shitakba Swami tepsetertembo chiok saka VHP lenir Togadia-i ashiba Khristan purtemang pur taküm piyong tepuokdak ayutsü obendang agütsü. Parnok anema obendang magütsü dang shitakba obendang agütsütsü pur obendangerbo tangaleni transfer odaktsür külenang obendang agütsü ta tasü tait nisung, Anto Akkara, shibai tai maketba Khristan purtem tepuokdak nungi chioktsü asoshi bendanga agüja inyaker paisa ashi.
Tang tepuokdak aliba tai maket Khristan pur tenetji – BhaskarSunamajhi, Bijay Kumar Sanseth, Budhadeb Nayak, DurjoSunamajhi, GornathChalanseth, MundaBadamajhi (pa yabo tekoloka meshitak) aser SanatanBadamajhi lir. Parnok ajak ya taküm tepiyong tepuokdak ayutsü asoshi obendang 2013 küm October nung agütsü. Iba sülen obendangba anemaji ken o benoka liaka ibaji mejembii atsülanger ta Anto-isa jashia metetdaktsü.
Parnok chioktsü asoshi amangba purtem ajaki sarasademdaktsüner aser ‘online signature campaign’ nung ya shilem agidaktsüner, ta paisa mepishia metetdaktsü.