Tai tasüngtangbatem kar

– L. Shilu Jamir, Dimapur.

Asenok taküm ya taginuba aser metetnuba, pei tejangrabatem tabu balala agi sunga lir. Aiben asenok taküm nung mapang masütang, tasüngtangba tai asüngtangba ajanga asenoki metetnuba, taginuba aser tejangraba menguteter. Itemji metettsü asoshi mapang shidak nung tasüngtangbatem shidak asüngtangtsüji kanga tongtipang.
11.Timoti. 2:23. “Saka tamaji aser tamashi tasüngtangbai rara adokdaktsür ta meteta, itemji tokjang”. Asenoki Tsüngrem dang tamashi tasüngtangbatem asüngdangba kar shisadangdi. Covid-19 wara ya shirnok asoshi yokba? Yisu dak amangertema iba wara agi atongtsü asü? matongtsü? Yisu dak amangertema iba wara agi asütsüa asü? masütsü? Shir menen yong tanu onok kangshidaktsür? Ya Tsüngremi temenenpurtem asoshi temerenshi yokba asü? Lokti tekülem sentep magitetba ya Tsüngrem jashir-a asü? Etc. Item tasüngdangba balala agi asenok molung sunga alitsü sudi. Ken ashitsübo asenoki iba ama asüngtangbaji tai mali amai saka iba ama wara mapang nung asenoki tasüngtangbaji asen molung nung tai asüngdangra asenok tetsübuang tali bendenloker asütsü, aser iba ama tai asüngtangbaji ajanga asen taküm, kibong aser lokti nung timtem aser shisabulu ang jenti adoktsü. Anungji iba ama timtem Covid-19 tashidak wara mapang nung asenoki tasüngtangbatemji shidak asüngtangtsü nungdaker. Tita 3:9. ” saka tamashi tasüngtangba kidong otsü, bangsentepba, item nungi na pilaang, kechiyong itemi tajangzük maka aser amajok.”
Tang ama Corvid-19 wara mapang ya asenok Yisu dak amangertemia tasüngtangbatemji komala ka asüngtangtsüla? Asenok ket nung rongsen lira, “Yisu Nai moatsüba nungi ni kechi mapa ka inyakdaktsüner”? ta asüngtangtsüla. Rongsena maka, lockdown ajanga mapa-a kecha meinyakteter, saka iba ama mapang nunga, “Yisu na asoshi Ni kechi inyaktsüla”? ta asüngtangtsüla. Asenokbo tang tashi nung Conavirus agi memenepdaktsüba asoshi, Tsüngrem tenung asangtsüla. Asenok Arogo aser lokti-i timtemer asoshi-a kechi inyaktettsü? Tang ama mapang ya, Tsüngrem sentsüwangshi asoshi nungdakbapurtem dang ni aser ozü kibong/lokti-i kechi inyaktsüla ta asüngtangtsüji tang mapang ya lir. Kechiaser “…Oh tamashi nisung, mapa medeni tamang tapunga ta nai meteter ma”?.(Yakob 2:20).
Asenok tasüngtangbatem tai asüba agi asenok jashir saka tasüngtangbatem shidak sura timtem, wara agi menepbaka asenoki koktet-tsü. Tasüngtangba koba nung pangsentepba lir aser tazangzük mali iba nung asenok mapang meindokli kechiaser iba nung shinga tajangzük mali. Filipi 4:8 “…langka tajung lira, aser langka nungsang lira item indang bilemdangang”. Covid-19 wara mapang ya asenoki Tsüngrem dang tasüngtangbatemji shidak asüngdangtetra, asenoki memetetdi Tsüngrem taochi ajanga asen Kibong, asen lokti aser asen lima anepba-adoktsü.