Tai tongloktsüba atema PM-i telangzüba agütsütsüla: Lalu Prasad

Patna, December 22 (Agencies): Brihostibarnü RJD tongti, Lalu Prasad-i, Rahul Gandhi-i Ato kilonser, Narendra Modi anema tai tonglokja aliba atema pai (Modi) telangzüba agütsütsüla, ta ashi.
Modi nem tai tonglokja alibaji Supreme Court-i ketdangsüa bushisüngdangtsüla ta shia RJD tongti Lalu-i, “Narendra Modi-i süpokrem sen jenti agiogo, ta Rahul Gandhi-i tai tongloktsübaji süoki ia agitsüla. Koba anogotem nung sen kwi agütsü’ar pai tejangja metetdakja lir,” ta ashi.
“Tai tongloktsüba atema Ato kilonseri telangzüba agütsütsüla. Tai tongloktsübaji tai süra kechiba pai (Modi) Rahul Gandhi anema tenüng menüktsüba ken o mebenoker?” ta Lalu Prasad-i asüngdang.
“Tai tonglokja alibaji Supreme Court ketdangsüba nung bushisüngdangtsü atema Ato kilonseri tuyutsüla,” ta paisa shisem.
Yashi Gandhi-i, Ato kilonser, Modi Gurajat Chief Minister inyakdang pai corporates dang nungi sübokrem sen crore 65 agiogo, ta aija liasü.
Rahul-i, “Income Tax department record nung- Modi-i ita trok tsüngda (2013-14 küm) Sahara Group dang nungi tekuben tashi sen agiogo,” ta aitsü.
Gandhi-i ashiba agi, 2014 küm November 22 nü Income Tax-i Sahara groups mita oa parnok indang records apudang Modi-i sübokrem agibaji jungkai adok.