Taidok agütsüba

Tai adokba ya Khristan taküm ka nung kanga dang tongtipang teinyaktsü ka lir. Atangji, asenok  temulung yirudang asenok dangi shisatsü asem arur. Mezüngbuba nung, asenok temulung taroktiba tonga yia yirur aser jashir aser tayang küpzüktsü tasa atonger. Tanabuba nung, ne temulung yirutsüsang den tesentaktep raksatsü bilemer. Tasembuba nung, Tsüngrem matsüngdang shitak ta shitettsüsa, na yirutsür aser nüna senteper khuretji koktettsü mesüra angatatteptsü atema bilemer. Iba ya ajanga nisung temulungjang nung putepa alitsü shisatsü sayur. Ajisüaka, kodang nisung ka jashidaktsüdir mesüra temulung yirutsüdir, idangji nisung mulungjangi temalen shia aliba shisatsü mezüngbuba aser tanabubaji arur aser tai atoktsübaji kenyongi mebilemer. Asenoki taidok agütsüba indang ken shisadangdi. Taidok agütsübaji kechi ibaji asenoki ken angatettsü merangdi. Tasen Lai nung taidok agütsübaji Greek nunger o – aphiemi, charizomai aser aphesis nungertem amshia lir. Taidok agütsüba den medemdanga amshiba o tem ya – agütsüba, anitetba, chiokba aser ajema akümba nungertem ratettsür. Item o ajanga taidok agütsüba jagi teyirutsür dang taochi sayur, kecha tebendang makaba sayur, telungjem atema apu laloker, aser tayang küpzüktsü mesüra temenok atema mebilemer ta asenok nem angajemdaktsür. Tsüngrem taochi agi ne dang mezüng tai atokba bilemtetang. Tsüngremi ne temenen atema tatok agütsü aser anogoshi Pai tatok agütsür. Tangari na yirutsüdang nai parnok anema tamajung bilemba ama Tsüngremia ne dak kasaji bilemra, nai sayatenya madak sayatenya ‘tekümtet’ mengula. Tsüngremi taidok agütsüba taküm shiai tangar dang tai adoktsüla, kechiba süra nisungi taidok agütsübaji Tsüngremi taidok agütsüba den mesüktepa lir. Taidok agütsübaji nisung ajak nem tenlar saka ajak nembo magütsür. Temulung memeyipba, mamangba, tai inyakba, pei-i hau ta magizükba aser taidok magütsübatem ajanga Tsüngremia asenok dang tai madoktsüa akok. Tai adoktsü merangdang, tamasa nai nüsasa taidok agütsütsüla kechiyong Yisu Khrista-i nü dang tai adok. Nü taküm nung tesüiba mapang nai aibelenba, tamakok anguba aser tejashitem ne temulungjang nung aibelenbatem aser temenen ama teyu. Yisu den külemi taküm tasen ka tenzükang. Temenen tamajungtiba-a asen Tsüngremi tatok agütsür. Süra, tangar danga tai tokang. Tangar anema nai temenen menabatem nai Tsüngrem dang nangzükang aser nü temulungjang nung sempaba aser tashimaitem atema tatok meshiang. Tsüngrem o tesayuba nung ajemdaker ne temulung yirutsürtem den jungteptsü merangang. Tatok agütsütsübaji nai mulungtetang. Tatok agütsüba inyakyimji mapang agitsü-a akok saka nai ken tenzükrabangla, ibaji nai Tanela Temeshi teyari ajanga tatembang tongtettsü. Na anema mapa inyakertem aser nai temulung yirutsürtem den putepa alitsü merangang. Tanü-asüng tensa ka nung alima ajaklen yimtenren, lokti aser kin balala tsüngda putepshitsü kanga nüngdaker, saka tamasa iba maparenji asen atepzüng nung, asen taküm nung asen temeket nung inyaktsüla. Otsü ka ajanga yamai ashir, ken mapang ka nisung kati missionary ka den jembidang yamai ashi “Kü dak tsünü ana lir. Tsünü ka dak tejashi, sempaba aser taku agi sünga lir aser tsünü ka dakji temeim, taochi aser aria bilemba sünga lir. Tenaprongla ya kati ka den rarateper.” Idangji missionary-i pa dang tena rongnung shibai raraji akoktsü ta asüngdang. “Ni koba nem chiyungtsü agütsür, iba jagi akoktsü” ta nisungba jagi langzü. Anungji, Tsüngrem o agi asen taküm süngdaktsüdi aser anogo shia asen mulungsentsü aser shisatsü Pa o nung aintsü merangdi, aji süra tangari asenok dang tai adoktsü aser asenoka taidok agütsür nisung ka asütsü.