Taidok agütsüba Tsüngrem(T.Ken 51)

“Oh ozü Tsüngrem Kibuba, Nai parnoki inyakba mang yangaka, parnok tai adokba Tsüngremji na.” (T.Ken 99:8).
Mulungsentsü tanga den apiteptsü makokba Tsüngrem sempet lir. Nisung tanelaji Kibuba milen lir, Pa telunglen shilem ajak bushir (A. Shin 20:27; 1 Kor. 2:11). Temulungsentsü tajungji jakla yanglutsü rongsen lir. Mulungsentsü jagi kechi shidak aji meimtsü aser kechi tai sempatsü angazükdaktsütsüla. Temenen sempatsüba dang nungi tajung meimtsü angazüktsü temülaba lir. Asenoki temelabaji shimer, tangabaji toktsüra, nisung rongnung asenok nüngtugu akümtsü saka Tsüngrembo mepeladaktsütsü. Temenen memeimtsü asen mulungsentsüi angazüktsü. Nai tajung meimra aser temenen sempara Tsüngremi ne dang pelatsü aser tamajungbai tejak ashiloktsütsü (Ibri 1:9). Asenoki asen mulungsentsü merüka ayu nung dang asenoki tanak aser temesüng memeyokteptsü (Isa. 5:20).
Shibai shi yimya tanelaren yimya nung melenshiner Tenem nung sayutsüngibaji kümdanga bushiang (Mt. 5:7). Iba dangi Tsüngrem yimli Temzüng (The Magna Carta of the Kingdom of God) ta ajar. Tsüngrem yimli indang sayutsü iba Sermon dang nungi tajungba mesayu. Iba sermon ya Temeshiba Lemjem lir. Iba tesayuba putu ajak nung tapet lir. Iba sermon temulung agi angazükba aser maneni shisadanga lir asenok mulungsentsü tajung agi sünga alitsü (Fil. 4:8). Item tajungtem asenok O aser mapa nung sayutsü. Asenok mulungjang nung kechi lir iba jagi mulungtettsü aser inyaktsü (Lk. 6:45). Yisui Tenem nung sayutsüngiba ama ali.
Pauli Yisui sayuba ama tia ajak nung ali. Shitakba tamang nungi terata pilaa ora Pai Pa sasa atsüngzük aser ashi, “Nenoki aji oda Khrista mangazük!” (Ef. 4:20). Tanü osangtajung pezü nungi sermon Khrista taküm yima masü sayatenya sermon dang agütsür. Asenoki Pa yimya nung manidaki dang Pa ainji metetner mesüra kanür. Iba jagi asenoki tenzükba teladakji sayur. Temeshibaji Khrista mesükba dang tali mesüra ajema masü. Shibai Khrista taküm otsü bushir atangji Pa mesüka akümtsü.
Sarasadem ajanga tashi mitdaktsüba tejangraba tanela jagi shi tashi maitji noktangtsü makok temenen nung tsüker. Mita aliba tetezü sarasadema Tsüngrem asenok den dena aliba metetta aliba lir. Asenok temenen metetta alibaji asenok Tsüngrem anasa aliba saku lir (Isa. 6:1-5).
Temeshi alitsü mapang agiang, alima ariteper; Yisu den kija miima mapang agiang. Yisu dak reprangba ajanga na Pa mesük alitsü, Ne tembartemi ne jakla nung Pa mesük angutsü. (William Longstaff, 1822-1894).