Taidok angutsü taidok agüjang

Aser ozüi kechi koda pi dang tai doka lir, aji oda ozü taia tokangma. Mathi 6:12

Mapa kar taidok agütsüba dang nungi agizüktsüba tali senti lir. Asen menen khuret bener külen aseni tai inyakba ajak nungi nüji kümdaktsübaji tesüngmangtsü ka lir. Yisui nütsüngtem dang parnoki sarasademba shia tai tokang ta sarasademang ta sayu. Asenoki anogo shia Tsüngrem anema inyaker ta Yisui metet. Asenoki Tsüngremi aginüba jenjang matonger. Anogo kata Tsüngrem dang tatok memeshi-i süidaktsütsü makok.

Asenoki asen anema inyaker dang tatok agütsüra, Tsüngremia asenok nem tatok agütsütsü kechiaser asenoki koda tangar dang tai atoker Tsüngremi yamaji asenok dang atoktsü ta Yisui tekümdangtsü agütsü (Matt. 6:15). Tsüngrem yimyaji tatok agutsutsuba lir (Anitet 34:6-7). Asenoki Pa nütsüngtem sünera, asenoki Pa tatishitsü nung anidaktsüla. Teti asen tsükchir dang Tsüngremi tatok agütsüra, asenoki tilaba kecha inyaktsü makok. Mapa kar nungbo tatok magütsütsüla ta Yisui mashi. Tatok magütsütsü Laishiba nung shia mali.

Nai kar nembo tatok magütsütsü mulungtetra ne tekülem aser sarasadem amajok (Matt. 5:23-24). Ne mulungjangi item tammangtem bushitettsü Tsüngrem dang asüngdangang. Nai taidok nüngdak bushidang tangar aibelenji mesüka alitsü Tsüngrem dang asüngdangang, idangji nai rishikangshir asoshi “Oba, parnok dang tai tokang” ta sarasademtsü.