Taidok Angutsü, Taidok Agüjang

“Aser ozüi kechi koda pi dang tai doka lir, aji oda ozü tai tokangma”- Matt. 6:12.
Tagizükba dang nungi tagütsübaji sentiba lir. Asenok menen khuret bena arur, shiba dang asenoki mejungi inyak, pai asenok nem taidok agüja nüji kümdaktsü. Ibai koda tesüngmangtsü! Yisui nütsüngtem dang Tsüngrem dang sarasademba shia taidok meshia sarasademtsü sayu. Asenoki anogo shia Tsüngrem dang anogo shia tai menar ta Yisui metetta liasü, kechiaser asenoki Tsüngrem sentsüwangshi metongtetter. Tsüngrem dang taidok memeshi asenoki anogo kata süidaktsütsü makok.
Asenoki tangar dang tai atokba ama asenok dang tai tokang ta Tsüngrem dang sarasademang, kechiaser asenoki tai atokba ama kasa lenmang nung Tsüngremi asenok dang adoktsü ta Yisui nütsüngtem dang sayu (Matt. 6:15). Tsüngrem yimyaji taidok agütsüba lir (Anitet 34:6-7). Asenok Pa nütsüng süra, Pa tsüngsü nung jajatsüla. Tsüngremi taochi makaba tsükchir dang atoktsü süra, asenok tajemba inyaktsü kecha mali. Tamajung karbo tai matoktsüla ta Yisui mesayu. Tai matoktsüla ta Laishiba nung tesayuba agüja mali.
Nai kar nem taidok agütsütsü sottadokra, ne tekülem aser sarasadem amajok (Matt. 5:23-24). Ne mulungjang nung memelungi iba nungi kümdanga alitsü Tsüngrem dang asüngdangang. Ne nüngdak tatok nendaka mita aliba ajanga tangar majungji tesangwa dangi arudaktsütsü. Na Khrista ama alitsü Tsüngrem dang asüngdangang; süra na rishikangshi danga nai sarasademtettsü, “oba, parnok dang tai dokang.”